來一則高空笑話，出出烏氣！

　　秋高氣爽。

 

　　藍天白雲。

 

　　林鄭、張建宗、陳茂波坐直昇機，帶同一電視台攝影記者隨行。

 

　　記者問：「事前咁神秘，今次坐直昇機，係咪視察吓有邊啲棕地可以規劃嚟起屋呀？」

 

　　張建宗代老細答：「Exciting好多。除咗施政報告嗰220項新思維，我哋仲諗到一條好橋，證明我哋呢個政府好勇，雖然唔係好勇武！」

 

　　「乜新橋？」記者非常好奇地問。

 

　　陳茂波就答：「你知伯南克係乜誰啦？」

 

　　「知，The Helicopter Man吖嘛，佢話要救美國經濟，喺直昇機上撒銀紙落嚟就得吖嘛。」

 

　　「係咧。但事實上，佢只係推行咗QE（量化寬鬆）。而家特首就真係做Helicopter Woman，撒啲一千蚊紙落去，一向我哋無論派幾多糖，都有人唔like，而家空中撒銀，就機會均等，皆大歡喜啦！」

 

　　直昇機低飛，在一廣場上徘徊，下面人頭湧湧。

 

　　記者說：「有咁多人喺下面嘅？唔通係事先已經張揚咗，啲人喺度等派錢？」

 

　　「冇喎，呢條橋係絕密嚟喎。」林鄭急急指出。

 

　　記者立即聯絡地面採訪組問：

 

　　「點解咁多人聚集喺呢度？」

 

　　「遊行集會吖嘛，新常態啦！」

 

　　「嘿！乜顏色呀？」

 

　　「紅黃藍白黑都有。」

 

　　從高空望下去，果然雜色紛陳，萬頭鑽動。

 

　　「點解佢哋唔互片互丙，竟然同一時間望上嚟呢？」

 

　　「我啱啱話咗畀佢哋聽， 林鄭、張建宗、陳茂波都喺直昇機上面吖嘛。」

 

　　下面起哄，然後歡呼。

 

　　記者向林鄭說：「佢哋咁興奮，係咪估到有錢派呢？嘿！呢條橋真係所有政治光譜都使得噃。」

 

　　三位高官大喜。

 

　　記者接著問同事：

 

　　「咦！啲群眾咁嘈，係咪話掟錢落嚟呀？」

 

　　「唔係，佢哋一齊話：掟人落嚟！」

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇