林鄭組班困局未破

　　好快就回歸廿周年，Tina相信依家全香港最心急嘅人，非候任特首林鄭月娥莫屬；事關佢埋班嘅進展仍然係非常緩慢，佢下面嘅三大巨頭都未有好合佢心水嘅人選，其他局長亦有唔少空缺未搞掂。比對三位「前度」，的而且確係遠遠落後。

　　Tina收到風，林鄭遭到佢心儀嘅精英份子拒絕，係其中埋班失利嘅一大主因；但另外一個更大嘅阻力，就係來自阿爺。聽聞林鄭就佢嘅班子人選，一直有同阿爺溝通，將唔少名字射上去北京，其中一個就係之前傳到沸沸揚揚嘅前歌手陳美齡，諗住搵佢做教育局長。不過，阿爺對於班子人選揸得非常緊，陳美齡同日本政商界關係咁緊密，阿爺當然係搖晒頭；但據聞林鄭仲有幾個人選，諗住無乜大問題嘅，阿爺都係唔肯畀個「祝福」，搞到林鄭早排都真係幾氣餒。

　　更加有建制中人透露，阿爺否決咗林鄭交上去嘅幾個人選(其中一位更係財政司司長人選)之後，林鄭直頭發返封信畀阿爺表達不滿，仲話希望阿爺可以相信佢嘅選擇都係合乎香港同國家嘅利益。

　　呢件事有幾可信，我覺得都係一半半，因為林鄭就算真係不滿阿爺隻手伸得太長，都未去到夠膽擺上面。不過Tina肯定嘅係，林鄭已經幾近去到「山窮水盡」嘅地埗，即係有啱嘅人填得到落個位到，都要填咗佢。

　　最大個窿當然係三個司長位。呢個星期亦都有媒體傳過，現任財政司長陳茂波好大機會可以過渡下屆政府。成個政府都知，林鄭上場第一個要踢走嘅，必定係波波；但波波有CY做後台，CY亦都早喺波波正式做財爺之前同阿爺落好晒藥，極力推薦。縱然林鄭萬般不願，但人名遞咗上去都石沉大海，又無其他合適人選肯入廚房，佢最終都可能要接納波波繼續做財爺。

　　政界人士估計最遲5月底都要有晒成個班底，但呢位政界人士就叫Tina打定輸數，新班底唔會有大驚喜！