人有好多種，原來「人仔」都分好多種，又「在岸」、又「離岸」，又有「中間價」，真係搲晒頭。究竟我返深圳食海底撈時候買人仔應該跟「在岸」定「離岸」價呢？「中間價」又係乜東東？今日《經濟不停學》登場，就先同大家講下人仔。

 

（shutterstock圖片)

「離岸」人仔前世今生，助中資企業「走出去」

　
　　離岸價(CNH)其實係2003年先「出世」嘅東西，由於阿爺對人民幣管制好嚴，以前海外/外國公司如果同內地企業交易，一係就海外公司喺香港「地下市場」買入人仔再匯返大陸，一係就先匯美金返內地再兌換人仔，聽見都覺得煩！

 

　　隨住中資企業要「走出去」，但又要對人仔進行管制，所以內地央行(人民銀行)同本港金管局就簽訂《清算協議》，允許在香港進行人民幣清算服務，以後中資企業想喺外國買嘢，就可以利用香港銀行體系進行資金交收。而香港作為人民幣清算服務嘅大城市，當然要有返一個屬於自己嘅市場價，所以就有「離岸人民幣」啦！喺香港用港紙唱定人仔現鈔北上消費，又或者貪仲有兩厘幾息做定期，統統都係用「離岸」價計算。

 

（shutterstock圖片)

 

在港換人仔跟離岸價，北上消費手機支付方便快捷

　
　　好多人見到找換店個價都唔知係離岸定在岸價。其實，在本港不論喺銀行買賣，定喺找換店都好，都係以離岸價為標準，所以大家想係香港換人仔都要睇啱價啦！另外，如果你有內地銀行戶口，又鍾意上到深圳至喺銀行兌換，就係跟在岸價。假如嗰期兩邊人仔價差好大，就可以自行選擇！

　　今時今日，其實手機支付喺內地已經好盛行，返大陸玩幾乎個個都有戶口，自從微信支付同支付寶香港版都開通跨境支付服務之後，已經可以用港幣支付人民幣帳單，而且匯率甚至比起出面找換店更好，分分鐘可以賺多杯水果茶慢慢歎！

 

（shutterstock圖片)

　　今集講住咁多先，下一集就講「在岸」價重要性，原來同投資內地資產有密切關係！

撰文：李皆穎

 

 

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

 

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

 

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G