《魚缸博客》昨日（１１日）美國勞工統計局公布數據顯示，６月ＣＰＩ年升３％，低過市場預期嘅３﹒１％同前值嘅３﹒３％；按月下跌０﹒１％，為２０２０年５月以來首次轉為負值，低於市場預期嘅０﹒１％，亦低於前值嘅０％。數據提振市場對聯儲局９月減息嘅信心，今日港股趁勢抽升，開市已經重上１８０００點大關。恒指成分股普遍上升，少數下跌嗰啲都係早果排升得多，出現獲利回吐情況，就好似華潤電力（００８３６）、比亞迪電子（００２８５）等。　　不過，今日股價逆市下跌嘅又唔一定之前升得多，好似南方航空（０１０５５）咁，股價近期一直處於弱勢。今日集團發盈警，預期截至６月３０日止中期淨虧損為１０﹒６億至１５﹒８億元人仔，比舊年同期虧損２８億人仔有所收窄。管理層話，蝕錢原因係民航發展嘅外部環境複雜多變，國內市場供過於求，國際市場恢復面臨挑戰，極端天氣多發頻發，疊加油價保持高位波動等等。講到好似淨係佢哋先要面對呢啲問題咁，唔通國泰（００２９３）無呢啲問題？國泰舊年已經蝕轉賺，仲有得派股息。而南航轉賺嘅希望就遙遙無期，所以，股價今日無得升之餘下，目前要跌大約２％。　　南航同國泰最大嘅分別係，國泰客流量以國際旅客為主，受到內地消費降級嘅打擊比較細。而南航主力做國內客，國際客相對較少。不過，內地今年無論係航班數量，定係乘客量，升幅都唔錯。三大航空公司之所以中期全部蝕錢，主要係受到消費降級影響，出現量升價跌嘅情況。由於一線城市消費力下降，二三線城市客源受到熱捧，形成所謂嘅下沉市場。下沉市場嘅特色就係價格敏感度高，只有用低價政策先至可以吸引到客戶消費。所以客流量上升，純粹是因為減價促銷所帶動。換言之，如果唔減價，好大機會造成客流量下跌，呢個就係南航以至三大內航面對嘅困局。　　呢種困局相信短期內難以扭轉！不過，南航自舊年高位６蚊附近跌至而家得３蚊左右，股價偏低，雖然未知下半年可唔可以轉賺，但預料最壞時刻已過，若股價返去２﹒９蚊左右，少少地買返多少都無妨。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情