比亞迪攻「日」其實唔係近期嘅事，最近又再出手，搵來前日產高管做設計師，整左部低價電K CAR，叫Racco（海獺），有咩Spec呢？雙電門、免觸用腳開門、實體鍵按扭、300KM續航、L2輔助駕駛、六個氣袋、暖凳、胎環加熱、10.1吋中控MON，最高配置都係賣12萬港紙；仲有3.3千瓦對外放電，日本成日地震，當係大電池無得輸。

　　假如拎埋日本國家補貼，11萬幾就有交易。話說其實比亞迪想賣六萬幾，但據聞日本汽車企業聯合反對，俾出個理由係：你賣咁平，我地賺咩？最後比亞迪唯有加返幾個口價。

　　之前比亞迪部Seal就搵長澤雅美賣廣告，呢次部Racco就搵國民級演員廣瀨愛麗絲代言。一石激起千重浪，有日本國民話廣瀨愛麗絲「賣國」，堂堂日本國民級演員點解要幫中資企業賣廣告呢？

　　不過博客留意到，最怕外資嘅竟然唔係日本人，因為有部分理智日本網民留言，話既然比亞迪可以六萬蚊做雙電門俾客人，點解日資車企今時今日仲只係有趟門，又話日資車企再唔進步就只會被人打下去。

　　其實博客所看，係網絡上留言最反對中資係日本賣車，並唔係日本人，而係網絡上嘅「酸民」，佢地都係用「電車容易爆炸」、「難搵充電位」做原因，不過佢地好似唔太知道今日內地電動車嘅威力如何。

　　退後一萬步，如果比亞迪EV真係日本無市場，咁又做乜特登整部Racco只賣日本，又做乜搵咁多代言人做廣告？就正正係覺得日本市場有得做，比亞迪先落資源入去，仲要搵返日本人自己搞，只係貼個中國牌子咁解。

　　如果呢架車係香港有賣，博客都幾有興趣，但係咪仲賣到12萬呢？

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽