《魚缸博客》噚日魚缸終於喺收市前突破兩萬一關口，博客留意到兩大具有防禦屬性的股份電能（００００６）和長和（００００１）逆市跌，莫非孖屐真係咁好景？　　花旗國總統大選結果有待揭盅，魚缸悶悶地搵題材炒，最近食住進博會風口，再再再再次炒起機械人、ＡＩ相關股，第四範式（０６６８２）、金山雲（０３８９６）、萬國數據（０９６９８）都有大量資金流入。　　唔好以為機械人呢啲ｈｉｇｈ－ｔｅｃｈ概念股只限民營科企，貴為老牌國企嘅上海電氣（０２７２７）先係炒得最勁嗰隻，今朝再炒高１５﹒８％，暫連升３日，市值累計升幅逼近四分之三。上海電氣上個月被注入母企機械人業務，今個月就撞正資金風口，真係夠晒ｌｕｃｋｙ。　　睇番資料，上海電氣被注入嘅資產，係由日本Ｆａｎｕｃ機器人同上海電氣控股在早年成立的合資公司發那科機器人，產品涵蓋智能機器人、智能製造解決方案以及設備全生命周期管理服務，要知道Ｆａｎｕｃ係世界上最大的工業機械人製造商之一，此前喺神州工業機械人市場佔有率居冠，咁又真係升得有道理。　　今日博客就順便講多一隻比較冇名氣嘅機械人概念股優必選（０９８８０），早盤最高升８﹒５％，高見１１１﹒７銀，預計近期會跟住機械人概念股上升。優必選今日微微突破１００天線（約１０５﹒６６元），可等企穩１００天線後買入，目標價為１２０銀。如果能突破１２０銀預計見強烈升勢。　《編者按》本欄搜羅即市傳聞，惟消息未經證實，《經濟通》亦不保證內容之準確性。　

想要獨家投資理財Tips？即Like etnet 全新Facebook專頁► 立即讚好