話說隻紫金黃金國際(02259)已經派彩，相信好多人都驚覺自己「有一手」，雖然博客撰文呢一刻官方仲未公布派彩結果，但據市場傳聞呢一水派彩好似有利「一手黨」，中籤率高達五成，即係如果你入飛抽一手，一係中，一係唔中。

　　咁樣派彩法真係少見，因為以往傳統定律都係抽得越多、派得越多，好少話一手黨中獎機率多過甲組乙組，博客唯一思考到，莊家可能真係想「炒高」而又唔想用自己錢，迫住大戶同散戶用溢價追貨。

　　你會問，大會一定追咩？唔炒你都得啦！不過，國際金價又屢創新高，呢一隻股又吹緊風，有望可以極速納入港股通，到時北水就可以落香港又炒多轉。

　　唔少分析師估計，首日最少有三成升幅，甚至五到八成都有機，不過想倍升就有小小難度，建議無貨可以等回吐再吸納。

　　博客利申，自己都係一手黨，都有一手，反正而家國際金價都跌唔落去，如果暗盤keep到有三成升幅都唔打算走住，首日掛牌可能炒得更犀利，反正得一手，點輸都有個譜，但贏就睇唔到頂，咪放多一兩日睇睇囉。

《編者按》本欄搜羅即市傳聞，惟消息未經證實，《經濟通》亦不保證內容之準確性。

獨家優惠【etnet x 環球海產】用戶專享全場95折，特價貨品更可折上折。立即使用優惠代碼【ETN1WWS】，選購五星級酒店級海鮮► 立即瀏覽