《魚缸博客》北水個個禮拜都換個新款，上次掃完小米，呢個禮拜就轉目標，就係中芯國際（００９８１）！而且金額都係北水額度頭幾位入面，究竟點解北水要狂掃呢？　　　美國打壓當然係其中一個因素，其實中國係有設計晶片（ＩＣ）以及製造晶片嘅能力，唯一被「卡關」地方就係光刻機，如果美國想禁止自己晶片技術出口，包括埋ＡＩ晶片，係咪可以完全禁得晒呢？博客聽聞過，其實市場一早有「白手套」幫中俄買貨，其中一個做法，就係去北歐開間所謂「科技公司」，然後話買５００張Ｎ卡４０９０，轉手就送去香港經陸路再運入中國，呢個過程全部由外國人經營，一個中國人都無參與。　　　而打壓中國晶片發展，點解中芯會炒高呢？其實晶片技術有分高中低階，手機晶片就係高階（目前介乎５納米－３納米），汽車晶片屬於中階（１４納米－１０納米），以及一般電器所用低階晶片（１４納米－２２納米），基本上中國係中低階晶片製造係無問題，唯獨高階晶片技術係外國企業被集中掌握；而過往中低階晶片，中國都係向韓國、美國等地集中採購，近呢幾年被打壓之後，就開始國產化，而中國被禁止入口之後，中芯某程度上唔再需要面對韓國三星嘅競爭，變成獨市生意。　　　係呢個情況底下，北水就開始狂炒中芯，睇返最新中芯持股數量，北水截至１月１５日已經持有２６﹒１６％，而其他行都係６－７％，某程度上街貨已經唔算多，同埋都係北水同北水之間互相炒下炒下，鑊氣勁濃。　　　　　　　　　　　　　　　　近五日北水買賣金額（港元）（資料來自經濟通ＨＶ機）＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝　　　　　　　　　　　　　　港股通（滬）　港股通（深）　　－－－－－－－－－－－－－－－－－－－－－－－－－　　０９╱０１╱２０２５　１８﹒３１億　１１﹒７２億　　１０╱０１╱２０２５　２８﹒２３億　２１﹒５７億　　１３╱０１╱２０２５　２８﹒８６億　１９﹒２４億　　１４╱０１╱２０２５　４２﹒３３億　２４﹒７４億　　１５╱０１╱２０２５　３８﹒８１億　２３﹒２６億　　－－－－－－－－－－－－－－－－－－－－－－－－－　　　咁作為本地散戶又應唔應該跟風呢？博客認為，其實買小小無傷大雅，確實，美國越打壓，中芯股價就越升越有，博客睇住佢呢半年由１０幾蚊升上３０幾蚊，如果有膽跟，已經可以過個肥年了！　　《編者按》本欄搜羅即市傳聞，惟消息未經證實，《經濟通》亦不保證內容之準確性。

樂本健【活力健康 迎新年】維柏健B+C維他命 激抵買低至$99► 了解詳情