《魚缸博客》今日最大新聞，就係美國國防部將騰訊（００７００）、商湯（０００２０）在內多間中國科企列入與中國軍方合作的企業名單，博客睇完就得啖笑，不過笑完又要解釋下。　　　博客研究騰訊大大話話十幾年，騰訊由一間科技公司變成遊戲公司，呢五六年來都係靠遊戲做主要收入，除非你話堆遊戲入面有飛機坦克相關類型，可以俾軍隊訓練啦，不過你咁屈完大家都係笑一笑。呢個亦都可能係民主黨係特朗普上台前最後的掙扎，睇你自己點解讀。　　　其實都睇得出美國而家似係藥石亂投、強弩之末嘅感覺，中美貿易戰打咁耐，又話制裁邊間又話禁邊間，其實係心理恐嚇大於實際作用，除左真係晶片被人制到有實際用途之外，其他都有解決方法，基本上美國而家都無咩辦法對付到中國；而家又話騰訊係軍方合作企業名單，博客必須引用網絡名言：你話係咪係囉。　　　大行點睇呢？花旗重申騰訊「買入」評級，並將其列為首選股及核心持倉股份，亦視市場拋售為入市機會，目標價５７３元。花旗喺研報指出，理解市場對此嘅恐慌反應，亦認為騰訊遭美國納入軍事企業名單唔一定意味有足夠的證據。該行相信，騰訊將與美國國防部努力合作，消除任何誤解，正如去年有數家公司喺有效解釋後，成功由名單中獲得移除　　　大行都話係入市好機會，你買唔好買？博客對正股無咩興趣，不過牛證就應該殺唔少，Ｃａｌｌ輪都跌到最低價，從呢到入手可能有機會過個肥年！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】恒指在2024年先跌後升，你點睇2025年港股走勢？► 立即投票