中移動係中期業績記者會上大派「高能量鐳射槍」？真的嗎？（普通話）真的啊！公然有組織、有預謀地派發「高能量武器」，萬一警察叔叔上嚟搜查，話你係軍火庫呀，到時國企都冇情講？咪住先！實情其實係......

燈!櫈!!就係佢喇!

實測：只係普通鐳射筆

　　相信大家都知，前兩日浸大學生會會長方仲賢因為買「觀星鐳射筆」，就被警察用藏有攻擊性武器罪名拉咗啦！而家啲警察對「鐳射」咁敏感，萬一班記者呢頭行出去，嗰頭就中移動高層俾人請晒返警署傾計咪大件事？

　　不過，大家唔使咁擔心，Jenny睇過中移動嗰支「鐳射武器」，唔算好大支，光都唔算好勁，啲鐳射光照落張紙到成分鐘都未有出煙，應該都係一枝普普通通嘅鐳射筆啫！雖然，Jenny就冇專業嘅實驗設施，應該都冇鑑定錯嘅！差唔多啦，警方夠冇去尋晚尖沙咀個「觀星會」，但憑感覺加目測就知係「筆」定「槍」，叻過Jenny呀！

年初已預備　好好嘢來㗎！

　　中移動都醒呀，派筆都戴返頭盔先，包裝盒上印有「激光產品」、「不可直視激光光束及不可將激光光束瞄準任何人的眼睛」，執行董事兼董事長楊杰就喺記者會上話，如果用來對付警方就係攻擊性武器，但當工具使用就係好嘢來㗎！

　　中移動個PR姐姐就同Jenny解釋話，公司一向喺發布會同埋股東會都會送下小禮物畀媒體，呢支「鐳射筆」年初已預備好架喇，都唔係第一次派，仲話其實有6個功能，等媒體朋友可工作上用到著。計Jenny話，呢啲敏感時刻，最好都係收埋唔派住喇！反正「鐳射筆」又唔會過期，下次Meeting再派都唔遲！