《Online有話兒》Scarlett與迪士尼上演羅生門：唔會再演任何Marvel電影

　　《Marvel》電影系列相信係唔少八、九十後嘅童年回憶，不過隨住《復仇者聯盟》大電影逐漸落幕，個人英雄系列都開展另一個故事。不過，近期上畫嘅《黑寡婦》就搞得唔愉快啦！因為迪士尼將呢套新電影同時係自己旗下串流媒體上畫，女主角施嘉莉祖安遜（Scarlett Johansson）認為令到佢損失慘重，所以兩者由好拍檔變成要對薄公堂。

 

 

 

Scarlett已收千五萬美元片酬，另加分紅

 

　　事實上，Scarlett Johansson拍《黑寡婦》時候已經收到千五萬美元片酬，另加電影分紅。不過佢係7月尾入稟洛杉磯高等法院，控告電影發行商迪士尼違約，刻意安排電影係戲院及旗下影視串流平台「Disney+」同步放映，令到票房暴跌，估計令佢損失5000萬美元(約3.9億港元)。

 

　　而Scarlett早前接受媒體訪問時表示：「唔會再參演任何Marvel電影」，當時有粉絲認為可能同《復仇者聯盟4：終局之戰》入面角色去逝有關，不過以目前情況而言，Scarlett都唔會再參演「黑寡婦」呢一個角色，原來呢句嘢係話中有話。

 

迪士尼線上平台因《黑寡婦》獲1.25億美元收入

 

 

（Shutterstock圖片）

 

　　其實電影發行商已經就網上串流收入問題，向Scarlett「補償」約2000萬美元（1.56億港元），而電影全球票房約5億美元（約39億港元)，戲院收入約3.67億美元（約28.63億港元），而Disney+串流網上收入為1.25億美元（約9.75億港元）。

 

　　不過，Scarlett認為迪士尼「雙重上畫」，令到電影票房大減，同時違反公司合同。由於係Disney+只需30美元就可以睇到呢部電影，而合同列明Scarlett大部份分紅來自戲院收入，所以網上串流就令佢損失慘重啦。不過係咪關事，最後都需要交由法院判決。

 

迪士尼見過鬼怕黑，《尚氣》唔會再係Disney+與戲院同時上畫

 

（網上圖片）

 

　　可能迪士尼見過鬼啦，所以唔會再做啲傻豬豬行為，接住9月上畫嘅《尚氣與十環幫傳奇》（Shang-Chi and the Legend of the Ten Rings）已經宣布唔會再係Disney+與戲院同時上畫，唔單止咁，年底上映嘅《永恆族》（Eternals）只會係戲院上映。

 

　　講起《尚氣》呢套電影，入面似乎係想針對華人市場，並且邀請梁朝偉、楊紫瓊同陳法拉拍攝，亦都係梁朝偉少有參與嘅國際級電影，據指會係呢套電影入面飾演大反派「滿大人」一角，唔知佢個眼神會唔會仲咁憂鬱呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇