港鐵炒車不是夢 仲有邊樣係OK

　　港鐵真係鑊鑊新鮮鑊鑊甘！Jenny細細個起就以為淨係得路面上嘅交通工具先會「炒車」，點知港鐵今日凌晨就真係將不可能變成可能，nothing is impossible！兩架測試緊新訊號嘅列車竟然炒埋一碟，係港鐵通車40年以嚟都未發生過！真係「威」出國際，無眼睇！

 

 

當笑話變現實就唔好笑了

 

　　唉！曾經，話港鐵塞車係一個笑話，而家佢日日準時先係笑話；話港鐵撞車，你會以為係發夢，點知今朝訓醒，佢真係撞咗（見圖）……轉個頭東鐵線又有人墮軌，都癱瘓埋，Jenny同一眾打工仔只能望鐵長嘆、轉搭巴士喇！

 

　　話說，港鐵2017年開始更換CBTC「通訊式列車控制」信號系統，話第時可以車密啲，大家出行就更方便云云，成個工程耗資成33億港紙，但家下竟然「嘭」一聲就炒車了……

 

換系統的Best Practices？

 

　　發生咁大件事，港鐵班高層都要一日兩次頻頻出嚟見記者解畫。港鐵常務總監金澤培喺下午開完會就話，初步睇係因為新訊號系統喺轉換後備電腦時出現問題，阻止唔到兩車同時「攞路」，所以就炒埋一碟啦！金生話，呢個訊號軟件嘅設計缺憾，系統供應商將會派4、5個專家嚟港協助今次調查，不過今次問題複雜，冇返兩、三個月似乎都搞唔掂喇！嘩！乜呢33億咁化學嘅？！

 

 

 

　　最諷刺係聽日同後日撞正一年一度嘅亞太鐵路大會，港鐵項目經理（訊號）羅志沖、同埋港鐵工程顧問王惠明將會主講一個研討會，主題係「更換訊號系統：最佳實踐（Resignalling：Best Practices）」。哎吔！今鋪實畀行家笑到面黃啦！Jenny無眼睇喇！

 

即使被欺騙再遇出軌 仍不離不棄

 

　　曾經好多香港人都以為，選擇港鐵就好似搵到個好老公咁，誠實又可靠，點知呢幾年佢話變就變，呃完一次又一次，今次仲出軌添！未來嘅日子我哋點行落去呢？但係無論係點，Jenny相信香港人對佢嘅愛都係有如滔滔江水，連綿不絕，你睇佢今日個股價就知啦！呢個時候港鐵最OK、最實淨嘅，可能就淨返股價喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好