李嘉誠三父子世紀同台！「 一切有為法，如夢幻泡影」誠哥佛偈有何玄機？

　　長和系前主席李嘉誠（誠哥）退咗休之後，全情投入「李嘉誠基金會」工作，Jenny都好耐冇喺公開場合見過佢老人家喇！但今日大家終於有機會喇！皆因誠哥一心向佛，今日由佢個基金出錢建造嘅慈山寺及佛教藝術博物館舉行啟用典禮，誠哥點都要蒲頭喇！點知仲帶咗個驚喜畀咁多位記者喎！誠哥真鬼馬！

超人三父子同台 搶鏡過林鄭同王志民

　　話晒係誠哥，人面咁廣，梗係請到唔少有份量嘅主禮嘉賓，特首林鄭同中聯辦主任王志民都有嚟㗎！不過大家最surprise都唔係呢樣，而係「小超」李澤鉅同「小小超」李澤楷都一齊出現吖！三父子世紀同台，真係冇乜幾可㗎！即刻謀殺唔少攝記哥哥嘅菲林！

佛偈有玄機你又明唔明

　　誠哥醉心佛學，今日致辭嗰陣都拋幾句出黎同大家講下佛偈。佢話，最鍾意嘅一句佛偈係《金剛經》入面嘅「一切皆有法，如夢幻泡影」，入面嘅深層意義係已無執嘅出世精神，化為積極嘅入世行動，叫大家看破執著咁話喎！又話八正道嘅「正見正思惟、正語正業、正命正精進、正念正定」，同香港精神承存相應，亦都係香港故事嘅中流砥柱。

　　雖然誠哥就好樂意同大家分享佛偈，但係當記者問佢關於呢排嘅社會大事，例如修訂《逃犯條例》同埋空置稅，誠哥都耍手擰頭，話「呢啲嘢唔講啦！哈哈哈！」、「今日個腦只有慈山寺、佛教事情，一定有機會再約大家傾。」前後都冇一分鐘就閃人啦！誠哥你應承會約大家再傾㗎！唔好呃我地喎！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情