施政報告開始諮詢喇！冇林鄭公仔「同行」So Sad……

　　6月嘅「完美政治風暴」仲未完，行會前日（9日）就率先講明要放暑假啦！手尾都未執完，就拍拍Pat Pat走人，相信唔少市民都仲有好多嘢想同政府講。

特首的「暑期功課」

　　呢個6月咁忙，唔知大家仲記唔記得，暑假就應該係特首林鄭做「暑期功課」嘅時候。冇錯！講緊嘅就係10月要交嘅《施政報告》喇！點解Jenny記得？事關噚日（10日）政府出咗新聞稿同Jenny講展開咗公眾諮詢囉！

宣傳廣告Down晒Grade

　　呢份《施政報告》係特首林鄭任內嘅第3份，政府就喺上年開始開放埋Facebook同Instagram，好彩今年都冇「撤回」。上年都仲話社會氣氛冇咁熾熱，今年……Jenny就真係有啲擔心會唔會成個Facebook同Instagram都係嬲嬲同粗口喇！

　　不過Jenny就留意到今年嘅宣傳廣告，就冇上年有埋特首個卡通公仔咁精美啦！唔知係唔係政府因為呢個「完美政治風暴」搞到焦頭爛額，抽唔到時間再整公仔呢？Jenny記得上年特首林鄭仲特登幫公仔親自配音，話「我希望同大家同行，共創未來」，可惜今年都冇咗啊！計Jenny話，如果政府仲想同市民同行，其實重用上年個Design再改改少少又有咩所謂呢！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】特朗普勝出美國總統大選，你點睇未來數年的世界局勢？你認為中美關係前景會如何？► 立即投票