西荷大戰 不要茅波

　　世界杯今夜3時上演西班牙對荷蘭嘅去屆決賽翻版，經過四年，兩隊陣容變化唔算太大。荷蘭上屆化身成《足球小將》嘅「明和小學鏟球部隊」，見人就鏟。當中主力殺人王、有武學大師「穿心腿掌門」之稱嘅尼祖迪莊更上演代表作，一腳踢到西班牙嘅沙比阿朗素胸骨都裂！

　　好在另一荷蘭重將雲邦美已經掛靴，如果唔係西班牙首戰要擔心嘅唔係有冇機會贏波爭衞冕，而係擔心對完荷蘭後會傷幾多個球員。

　　做球迷其實最想係睇好波，最憎就喺茅波。雖然爭勝心強喺好事，但絕唔應該為勝利而傷害對手，我聽老球迷講，以前好多球隊為贏波，故意鏟傷比利、馬勒當拿，非常過分。今屆傷兵已經好多，一個唔覺意又傷多幾個球星，到時真係唔知睇邊個好！？

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動