老公陪入院切脊椎腫瘤粉碎家暴傳聞 李蘊冧爆

　　【晴報專訊】現年30歲的李蘊（Renee）日前在IG上載抽血相，卻被花生友質疑是否被家暴，令Renee嬲到噴火。前晚，她上載躺在病床上獲老公陪伴的自拍照，透露因脊椎腫瘤入院做切除手術。身在廣州的Renee昨日回覆《晴報》時，表示腫瘤的化驗報告要兩日後才有結果，她感恩稱︰「住院期間老公、媽咪輪流嚟照顧我，知我手術成功後老公先放心去返工。」乘機反擊黑心網民。

 

 

　　Renee於15年嫁給內地金融才俊羅章冠後，為丈夫先後誕下一子一女，她淡出娛樂圈並長居廣州，婚姻生活美滿。不過，日前她上載眼濕濕抱住女兒的照片及抽血相，竟被網民嘲諷她是否被老公家暴，她當時澄清：「老公對我不知幾好。」前晚Renee於IG上載限時動態及照片，自揭因腰酸骨痛數月，心血來潮下看醫生，「一照磁力共振後發現有脊椎腫瘤…已經全身麻醉切咗粒嘢拎去化驗，驗清楚係咩嚟。因為（腫瘤）黐住神經，所以無得做微創，醫生話傷口5cm左右。」

 

自爆插尿喉小便無感覺

 

Renee在病床上休息時，不忘偷拍老公講電話，乘機放閃。（IG圖片）

 

　　昨晨Renee又po自拍短片，她與丈夫打情罵俏，更獲對方餵食。Renee寫道︰「我個私家男看護梗係負責餵飯啦，前兩日講起家暴，你覺得我似唔似被佢家暴？」她昨日接受本報電話訪問時稱︰「我喺廣州一間醫院做完手術，依家只可以打平瞓，腫瘤攞咗去化驗，要兩、三日先知結果。（擔心壞消息嗎？）又唔係好擔心，事情都發生咗，依家照顧好自己身體先，同埋我有買保險，可以claim到錢。」談及住院期間要躺在床上休息，無法活動自如，Renee表示︰「醫生話要平瞓三至五日先可以落床，我有插尿喉，但完全唔知幾時屙咗尿，因為插喺膀胱，就算玩電話都唔可以玩得耐，因為隻手會好攰。」

 

Renee獲媽媽悉心照顧及餵飯，令她深感「世上只有媽媽好」。（IG圖片）

 

手術前通知G.E.M.何超蓮

 

長居內地的Renee經常帶一對子女遊山玩水，生活寫意。

 

　　Renee表示一對子女現時交由老爺和奶奶照顧，老公及媽咪則輪流到醫院照顧她︰「我媽咪今日（昨日）都嚟咗醫院，媽咪餵我食嘢，老公知道我手術成功之後都放心晒，所以返咗工。」她表示入院前已通知好姊妹何超蓮及鄧紫棋（G.E.M.），「佢哋都有祝福我，同為我祈禱。（佢哋嚟探你？）依家唔可以探病，只可以一個家人喺病房陪我，朋友都嚟唔到，我都唔想耽誤佢哋工作，有心就得，朋友在心中。」

 

閨密G.E.M.（鄧紫棋）上月中到廣州工作時，特地與Renee聚會。

 

轉載自: 晴報

• 

第九屆「傳媒轉型大獎」請投etnet經濟通一票！ ► 立即行動