立法會修改會議規則成為政界今年最大嘅戰場。單單係噚日會議，已經要三度暫停，期間更出現有建制議員一邊大聲發言，另一邊泛民持續敲枱敲櫈叫囂，無規無矩情況已經攀上大帽山頂。

　　今次建制派提出修改議事規則，被喻為係「終極剪布」；當中三招絕招，就係建議將法定人數由35人降至20人、賦權主席可以喺流會之後隨時復會，同埋主席有權唔批准議員提出中止或休會議案，或不設辯論直接進行表決。三招過晒的話，非建制派日後仲想透過拉布重現拉倒創科局、醫委會改革呢啲場面，應該都無可能再見到。

　　當初要修改議事規則，就係因為多名非建制議員被DQ，令到直選議席建制多過非建制，成件事先叫做開綠燈行得郁。所以理論上，只要喺3月補選之前成功過到修訂，建制已經係打贏場仗，唔使咁急就章一定要喺2017年完成。

　　但據聞今次建制派收到嘅「幕後」柯打係「有咁快得咁快」，西環更有專人坐定定監察整個過程同寫報告，令到建制嘅緊張程度係史無前例，比起政改有過之而無不及。消息就話，當日政改擺明係過唔到，大家都係做吓樣、過吓場做場大龍鳳；但今次修改會議規則就唔同，成功已經只係遲同早嘅問題，過咗之後得益嘅都係整個建制派同政府，佢地當然更加著緊。其次，有傳話政府已經磨刀霍霍，佢地希望盡早完成修例，同埋喺3月補選之前，有足夠時間通過「重要」法案。

　　至於「重要」法案係乜，23條當然未有耐打到嚟；但按時間表，相信一地兩檢已經放晒喺林鄭枱面等緊送過立法會；為免夜場夢多，快快手過咗修改議事規則、人大配合公布一地兩檢安排、立法會通過法例，呢個「直通車」相信好快就開。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【雙11感謝祭】雙重優惠、多買多賞► 了解詳情