林鄭公布2020年施政報告，本身亮點就無乜，因為大家都預咗林鄭會將焦點放喺融入大灣區、配合國家戰略發展等等等港人都唔多熟悉嘅詞語入面，叫Tina評分，我都真係唔多識得評。不過可幸嘅係，份報告無乜亮點唔緊要，第二日搞嘅答問大會有笑點，就令到大家苦中一點甜。

　　林鄭喺立法會答問大會開場發言，罕有咁點咗幾位議員嘅名，包括潘兆平、吳永嘉、張華峰、葛珮帆同陳克勤，話已經將以上幾位議員嘅訴求納入施政報告，即係有「特首認證」嘅「成功爭取」。

　　讀者應該都知道，「成功爭取」對議員嚟講就係政治生涯上嘅最重要成績表，唔少區議員、立法會議員掛喺街頭嘅Banner，細至「過路燈延長2秒」、大至「60歲2蚊乘車優惠」，全部都印到大一大，驚死街坊睇唔到。今次由特首親口講，更加好似係DSE成績單上面嘅5星星，呢個認證即時惹來唔少議員嘅「真葡萄」，田北辰同埋石禮謙兩位重量級議員亦都先後出聲。

　　議事堂上出現少見嘅「葡萄味」之外，據聞散會之後，立法會大樓嘅「葡萄」仲多到夠開個酒莊釀百箱紅酒。Tina八返來，唔少無被林鄭點名嘅議員，私底下都大罵林鄭「不該」。一不該當然就係點名成功爭取，二不該就係點嘅黨又唔覆蓋晒全部建制板塊，令到黨與黨之間有不滿之外、黨員同黨員之間亦都會有心病，「今次唔係We Connect，係Disconnect！」

　　不過議員之間更深層嘅鬥爭，最主要係來自阿爺。聽聞阿爺對於今次施政報告異常緊張，因為當中有唔少涉及內地嘅惠港政策，所以阿爺好想建制派喺議會好好咁表現，事前已經非常關心答問大會。建制派估計，成個答問大會都會有西環同北大人睇到實，變相林鄭今次表揚幾位議員，就直接入咗阿爺嘅耳仔，呢個成績單，先至係令到無被點名嘅議員，係咁指住啲葡萄話係酸嘅！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票