真的地獄減肥法

　　首先聲明：本篇並非減肥實錄，而是鬼故，還是真事。

　

 

　　這事發生在朋友的妹妹美琪身上，她是肥婆，整天嚷著要瘦身，今次三個月竟然減了30磅！不過催化劑並非減肥師，而是來自地獄的狙擊手！

　

　　美琪去了美國一趟，回來就不舒服了，初時以為是在長途機上穿的新運動衣太緊了，也不以為意。

　

　　然後真的來料了。

　

　　她開始每天痛幾次，整副腸胃抽住，痛得她眼淚直流，遍訪名醫，仍然毫無頭緒。

　

　　一天她女兒到一道場拜祭外婆。甫抵達即被請了去見那裏一位教授，他早吩咐了義工，一會兒會有位少女來祭祖，務必延見。

　

　　教授問少女：「你媽咪最近係咪離奇病咗？」

　

　　「係呀！」她詫異地回答。

　

　　「係一隻男鬼嚟討債，你媽咪有一世欠咗佢幾十斤黃金。」

　

　　「嘿！我只聽過國內大媽買金以両計。幾十斤？當時肯定係天文數字啦！」

　

　　「所以佢不斷策劃報仇，可惜每次就追到，你阿媽又去咗投胎，今趟趁佢去美國，終於截到咧！」

　

　　「有一點好奇怪呢，我媽咪鍾意唱粵曲，而且唱得唔錯。每當佢開腔，就唔痛咧，所以佢以音樂嚟止痛嘅。」

　

　　「你有所不知咧。隻男鬼生前酷愛粵曲，所以一聽到佢唱，就停止攪嘢。」

　

　　教授跟住凝重地吩咐她：必須把母親帶來。

　

　　到了約好的時刻，美琪正要出門，突然兩腳像釘了在地板上似的，不能動彈，少女找來幾位健碩朋友，死拉硬推地才把她「抬」到道場。

　

　　開始講數。

　

　　教授曉以大義，男鬼堅持追債。此時美琪已開始發燒發冷、渾身出水、口吐白泡。

　

　　突然教授拍枱起身說：「你若堅持唔走，我有辦法令你魂飛魄散、灰飛湮減！到時你討債不成，仲失咗投胎機會。我最後勸告你：你馬上走，我會為你念足七七四十九日經，助你投生善處，來生創業，賺番幾桶金。」

　

　　「都好，不過，我識上身，唔識走人喎！」鬼魂說。

　

　　折騰了一會。教授說：「咁啦！污氣病氣都可以從腳底走。你試一試啦。」

　

　　果然奏效。

　

　　美琪今次執番條命、兼執正身裁。不過她絕對不推薦這恐怖減肥法，如果冇人救，減得成都變艷鬼啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇