世界猛人逐個捉 預告時局測禍福

　　上期講香港道觀乩文，既宏觀世界、又微觀香港。仲預告風雲人物，如何以其ambition與action攪到風起雲湧、攬寸個國際party！

 

 

　　這道觀內的「呂祖降示」點評各國領袖，又真係幾spot on喎：

 

　　安晉三 秋田一犬：呢句有啲玄！安倍晉三唔知邊一忽有秋田犬咁可愛？咁係咪指佢做美國鷹犬，狂吠中國？抑或暗示佢想重振大和軍魂，終是空等？

 

　　希拉莉 素懷悉索：果然忐忑。

 

　　俄普京 亢龍有悔：佢因剛愎倨傲，輕取克里米亞，而遭歐美多國制裁，陷入孤立困局，經濟持續低迷，佢趁上周杭州G-20峯會期間，急急補飛，頻頻曝光、多多拉攏。

 

　　金正恩 瞎頭核腦：肥仔恩肆意發射飛彈、製造核武。上周佢真係activate佢個核腦，攪咗個北韓歷來最大核試，威力係逾萬噸炸藥，弄得南韓日本登時一陣心房顫動。講到瞎頭核腦，哈！原來呂祖嘅文字功夫都幾刁鑽，擅長玩音玩字。有機會要向佢討教一下，如何泡製廣告神句？

 

　　蔡英文 尊夷攘王：尊崇美國，抗拒中央。

 

　　亞奎諾 夜郎自大：年初菲國仍由佢揸弗，佢仗著美國撐腰，挑戰中國南海主權，以小國欺大國，煩到你跳舞！

 

　　密黑爾 開門揖盜：打開歐盟之門，迎進難民，其中有不法之徒，亦有恐怖份子，攪到呢位德國最有權力嘅大媽一頭煙，睇嚟仲會烏紗不保，連任失敗。

 

　　李顯龍 蕭規曹隨：好明啦！食住老豆開咗嗰條水。

 

　　奧巴馬 美印同巡：拉攏野心勃勃嘅印度、圍堵中國，斬斷你一帶一路嘅米路。

 

　　馬英九 斯人憔悴：唔只落敗失勢，仲俾蔡英文困喺台灣，唔準佢出去風騷，以免洩露國家機密！又被名咀周玉蔻多次影射佢非法收受黑心食油風暴嘅頂新集團政治献金，令佢清譽蒙塵！佢正興訟以證清白。

 

　　此乩文最吸晴嘅部份係講梁振英，批佢「冧莊尋夢」。

 

　　不過此批除了肯定其參選野心外，暫時仲係好吊譎。

 

　　「尋夢」一詞，可指夢境非真，CY只是一廂情願造其春秋大夢，喻輸；但亦可解作佢尋求冧莊，以圓其中國夢，喻贏。

 

　　不過又唔怪得呂祖先師咁騎牆嘅，連亞爺而家都可能未決定點擺棋，呢位道教教主梗係未隔空攞到file啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】有學者倡60至65歲以下長者之2元乘車優惠，設每月補貼上限700元，你點睇？► 立即投票