【關於商場的冷知識】用獨特香味吸客？電梯快定扶手梯快？點解冇時鐘？

　　香港除咗多葯房、金行之外，以面積比例計算其次就係多商場。香港大部分商場都係連地鐵，連得地鐵都會有一定人流，但其他國家就未必有咁多「地鐵人流」可以享受，所以好多商場marketing 都會出奇制勝，衍生出好少人知嘅marketing得意策略。

 

 

　　其實商場每一層嘅商店都係有計過度過，尤其係地下 G/F或者近街道嘅樓層，因為呢一層係商場吸引外來顧客嘅第一步，亦係人客對商場嘅第一個感觀。先唔計某啲有特別主題、或有特別目標客顧嘅商場，其實大部份商場第一層嘅佈局都差唔多，都主要係專打女人生意嘅商店。因為一般女性購物力同購物慾比男性強，加上男性多數係有「目標購物」，女性就較多「即興購物」，所以多數第一層都係女仕用品如香水、化妝品，名牌女裝等。而且化妝品／護膚品對女性嚟講係「必需品」，所以女性好難逃出商場香味嘅五指山，而女性入得商場，男性亦難逃一劫。

 

　　香氣亦係最能夠吸引顧客嘅方法，就算你合埋眼唔睇都避唔開氣味。最煞食嘅係，「氣味」有陣時比「視覺」更能加深印象，行街時聞倒同一陣味果種力量，係大過你見倒同一張海報。就好似你未必記得澳門賭場有乜玩，但只要聞倒「新豪天地香味」你就會feel到有霸氣嘅感覺。

 

　　另一樣常見嘅得意嘢就係，商場成日都會令你有蕩失路嘅感覺，唔單只係商場，大型傢私舖同賭場亦一樣。相比起商店，商場難有經常性嘅改動，所以有啲商場會用「電梯策略」。早年日本有研究分析，究竟係商場內搭扶手電梯快，定搭電梯快，個答案係平均計一樓到六樓扶手電梯勝，七至九樓打和，十樓以上電梯勝， 因為咁顧客潛意識地對搭電梯/扶手電梯有選擇。

 

 

　　咁即係點？邊個快其實冇乜相干，但「兩者嘅時間快慢」同「扶手電梯嘅位置」就會左右商場嘅佈局，所以外國／香港有啲商場會特意係中間樓層加建扶手電梯（如apm, Time Square），由二樓到四樓，再由四樓到七樓，表面上好似為顧客帶來方便，但實際目的係為咗減少顧客乘搭電梯，增加各層人流，亦能夠指定地派人流到中層商店，再計而加商戶租金（應該係），一舉幾得。

 

　　其實商場marketing 仲有好多得意嘢，例如多數商場都係冇時鐘，等你開心快活不知時；又或者food court 通常都係位於地庫或者頂層，令你行到最高要返落去地庫食飯，或者迫只想食飯嘅你要去最頂層，增加購物機會等等。

 

　　唔係每一個marketing solution都係驚為天人之事，只要思考多加轉變，商機隨處可見。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇