【開心的定義】返工賺錢志在洗　唔識尋開心只會Total Loss

　　你唔可以用錢買開心，但你可以用錢買一個機會去令自己開心。

　　記得，用錢只係有機會令自己開心，因為有時用咗錢，反而會操心。

　　有人一擲千金，用150萬比首期「上車」，但日日提心吊膽，擔心加息、擔心一日樓價下跌，變成負資產，或者擔心樓價一年內升唔到想要嘅水平。又有人用咗1萬5千蚊，請家人去上海旅行，縱使唔係豪華團，亦無入住六星級酒店，但旅程中家人嘅互動、互相取笑，一點一滴都足以令大家回味多年。有時洗錢多少同你有幾開心並非成正比。

　　賺錢只為自己獲取更多機會令自己開心。有啲機會，你知道比較大容易令自己開心，而且開心得更長久；但有啲機會，只會令你有短暫嘅快感。快感過後，更可能會有失落；有啲用錢買返嚟嘅開心只適用於某一類人，如果人云亦云地將錢投放喺別人認為嘅開心之上，到時錢又洗咗，又唔開心，只會total loss。

　　有一位法官喺哈佛大學向一眾畢業生致詞，有別於希望大家good luck、前程萬里，佢祝大家「盡快遇到惡運」。法官解釋如果一個人曾經遭遇不幸、曾經歷過不愉快事件，先會懂得何謂真正開心快樂、先會知道邊類型嘅開心最適合自己。你愈年輕遭遇不幸，你就愈多時間為自己爭取真正開心嘅機會，減少浪費時間、浪費金錢去換取短暫快樂。

　　工作無非兩大原因——餬口同埋賺錢換取機會比自己做喜歡做嘅事。了解自己真正喜惡，自然可以減少浪費花錢喺無謂事上。你又有幾了解自己？有咩事能令你真正開心？又有咩事能令你真正長久地開心？每日辛苦返工賺錢，係時候為自己檢討專屬標準。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票