【上位必讀】上司唔識做決定？ 「令高層倚賴你」才是小薯的職場生存之道

　　職位愈高，文書處理、項目執行嘅工作就會愈少。取而代之嘅工作就係策劃同 make decision。但現實中，往往有好多上司唔太鍾意做決定。

 

　　上司唔想做決定嘅原因大致有三個：一、唔做決定，即唔駛「上身」，有錯亦唔關自己事；二、上司明知自己能力不足，所以採取拖延策略，畀時間自己再三思量；三、上司可能亦要先請示自己嘅上司，先可以做決定。

 

　　一段上司下屬嘅關係，上司無可能唔做決定，因為好多時下屬都要等待上司嘅指引同方向去執行工作。上司無指示、無方向，下屬亦無所適從，同時亦會覺得上司「無料」。所以要做到逃避責任，但又唔會令下屬覺得自己廢，其實係一門久經訓練嘅「偽術」。

 

　　Email 溝通時尚算比較容易偽裝，但仍然有跡可尋。呢類上司習慣喺 email cc 一欄裏面加入更多同事，務求尋求更多人嘅意見。到達致共識後，責任亦可同樣攤分。

 

　　當面對面溝通，或一班人開會時，呢類上司就習慣問：「大家有咩諗法？」、「咁下一步大家覺得應該點做？」之類嘅問題。

 

　　上司或老細提出呢類問題其實正常不過，收集意見之餘，亦可從中窺探員工嘅判斷能力。但如果上司經常提出呢類問題，但最終缺乏方向性指引，討論幾個鐘又無結論，就彷如無討論過一樣，呢啲上司就可能係一位「偽術家」。

 

　　如果上司經常遲疑不決，的確幾令人氣餒。唯一可以做嘅就係比其他員工更主動，畀多啲建議，為上司多行幾步，令上司更倚賴你。　"Make your boss’ life easier." 永遠都係升職向上爬嘅重要條件之一。

 

　　做決定的確存在風險，但上司（同公司高層）嘅價值就係在於 make the right decision。如果唔想負呢種責任，或覺得壓力太大，咁就只好繼續喺較基層嘅位置徘徊。

 

　　身處職場，責任、壓力同金錢好多時都係成正比例。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票