【及早計劃】500萬真係夠退休？學懂有效儲蓄，為將來生活做好準備

　　儲蓄可以話係永遠都唔會錯嘅習慣，你可以話佢唔夠好、唔夠快，但一定有幫助。因為不論你想投資、旅行、創業等等，所有事情都係由儲蓄開始，而能唔能夠好好地運用呢筆錢去成就大業，又係第二回事。

 

　　早年有公司就香港人儲蓄習慣做咗調查，發現年青人每月平均儲蓄約$3,700，理想退休需用約500多萬左右，並指只如果能夠有5%嘅年回報投資，30多年後就能夠有500萬。但其實喺不同年齡階段，究竟要有幾多儲蓄先係合理呢？而500萬又係咪真係夠退休呢？

 

　　儲$3,700可能對部份人嚟講好多，所以有專家建議每月最少儲蓄為人工嘅10％，先假設一位有大專學歷打工仔嘅平均收入如下：

 

　　20-24歲 : ~14,000

　　25-29歲 : ~18,000

　　30-34歲 : ~24,000

　　35-39歲 : ~32,000

　　40-44歲 : ~36,000

　　45-49歲 : ~39,000

　　50-54歲 : ~42,000

　　55-59歲 : ~42,000

　　60-65歲 : ~35,000

 

　　再以每月10%儲蓄及每年有5%增長計算，不同年齡層嘅儲蓄為：

 

　　30歲 : 29萬

　　40歲 : 93萬

　　50歲 : 211萬

　　60歲 : 410萬

　　65歲 : 547萬

 

　　以上嘅計算只係一個假設，要每個月持之以恆，再加上投資收入穩定，同時受通脹、個人際遇、人生大事等不同因素所影響，儲蓄同收入可以有好大變化，所以以上數字只能作參考，未必適合每一個人。

 

　　而65歲退休後大約要準備25年嘅生活費，先假設唔洗交租，每個月有七、八千蚊（25年約210萬）嘅生活費，可以支持到最基本生活，約35%生活雜費，20%醫療費用，45%每日三餐；如果每個月有一萬（25年約300萬），就可以食好少少，亦可以參加超短線國內旅行團；每個月有一萬六（25年約500萬），除咗可以食好少少之餘，仲可以間唔中去短線亞洲旅行，生活算幾舒適。

 

　　及早計劃未來，安排好退休後嘅生活當然重要，但重點係，千萬唔好因為太過追逐退休後嘅生活，而令到當下嘅生活失衡，就會變得本末倒置。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情