《MakeMoney》投資以太幣仲趕得切？機會嚟啦飛雲！

　　虛擬貨幣價格真係高潮迭起，上個禮拜比特幣仲破緊高位，呢個禮拜又話大跌一成，心血少啲都頂唔順。不過，投資虛幣就從來都係「放長線釣大魚」，好多幣界人士認為，比特幣熱潮會慢慢減退，取而代之就係以太幣崛起！究竟家陣入以太幣仲趕唔趕得切呢？呢集《MakeMoney》就同大家介紹下係「幣災」定「幣Joy」啦！

 

 

比特幣VS以太幣，究竟市場炒緊乜

 

（Shutterstock圖片）

 

　　近期市場熱炒比特幣及以太幣，連帶其他幣種都一同升天，市場熱炒梗有原因！早前中國積極打擊比特幣交投及挖掘，令到幣價一路插水；另一邊廂，中美國家薩爾瓦多宣布將比特幣納為法定貨幣，因此令到幣價一度炒高，市場預計其他國家有機會仿效，繼而推高幣價！

　　至於以太幣，由於平台合約屬開方式（ERC20），唔同嘅山寨幣以及NFT藝術品都選擇用以太坊呢個平台作開發；加上以太幣最近進行「倫敦硬分叉」，原本係想解決燃料費（Gas Fee）高昂呢個問題，點知分叉之後燃料費不跌反升，更扯高埋以太幣價格！

　　不過最近呢幾日幣價再度回落，市場分析師認為，回落係因為近期比特幣及以太幣價格狂熱，出現獲利回吐的跡象，但長遠而言仍睇好，特別兩種幣都仍處於上升軌道！咁係咪又代表兩隻幣可以繼續入場呢？

 

＊以太幣前景看高一線，皆因平台開發性？＊

 

（Shutterstock圖片）

 

　　唔少分析認為，以太幣前景較為樂觀，皆因以太坊屬於一個「開放性」平台，假如你想發行一個新幣種，都可以使用以太坊作為你嘅平台合約（ERC20），好似近期熱炒嘅柴犬幣（Shiba Inu Coin)，就係用緊呢款合約；另外，近期個個都講緊嘅NFT（非同質化代幣），包括將藝術品整成Token再發售，好多都係使用以太坊技術。不論係山寨幣定係NFT，只要用以太坊平台而進行交易，就需要「礦工」幫手將交易打包上區塊鏈作為紀錄，過程就要支付燃料費（Gas Fee），而以太幣就係以太坊嘅支付幣種，所以佢嘅價格炒高並唔係無原因！　

　　至於比特幣，雖然而家係四萬六至五萬二美元之間上落，不過外界認為以太幣終有一日會跑贏比特幣，雖然比特幣作為首款擁有區塊鏈技術嘅貨幣，但開源程度始終無以太坊咁大，所以終有一日比特幣將會被淘汰，並由以太幣取代。因此，有指比特幣屬於「區塊鏈1.0」，以太幣屬於「區塊鏈2.0」嘅說法。

 

＊「區塊鏈3.0」殺到嚟，以太幣仲企唔企得穩？

 

（iStock圖片）

 

　　自從有以太幣出現，大家都發現虛擬貨幣嘅「開放性」有幾咁重要，類似以太幣嘅幣種如雨後春筍咁出現，其中Cardano嘅ADA幣就被外界認為係「區塊鏈3.0」啦！

　　近期大家都留意到，不論比特幣定以太幣，係燃料費上面都十分昂貴，令到交易成本上漲，同時交易時間都係十分長，皆因兩者都是用「工作證明演算法」(PoW)，假如一大堆人同一時間進行交易，就會出現「塞車」情況；Cardano嘅好處在於不需要任何挖掘作業嘅權益證明演算法，因為區塊係由利益相關者產生，而利益相關者就係持有一定數量代幣嘅用戶。

　　唔少人認為，Cardano既可以解決以太坊交易慢嘅問題，同時交易成本又低，相信佢將會係「以太坊」殺手。所以話，假如以太坊再唔更新的話，好容易就被後浪追過，呢個亦都係追入以太坊嘅風險所在！

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！ ► 立即行動