「暫緩再議」論起 政府會唔會縮手？

　　修訂《逃犯條例》喺香港傾極唔掂，而引發今次修例嘅台灣殺人案，疑犯陳同佳今日（29日）就喺高等法院被判監禁29個月，不過佢已經還柙咗13個月，如果佢喺獄中行為良好，仲可以扣三分一刑期，淨返大約19個月刑期，即係大約坐多6個月就可以出獄！

　　判咗刑，法庭就暫時冇嘢可以做，但係社會對於修唔修例就仍然有好大爭議，加上噚日反修例嘅遊行人數都打破咗佔領運動以嚟嘅紀錄，雖然署理特首張建宗就話「人數多寡並唔係我哋嘅重點」，之但係今日連有「憲報」之稱嘅《星島日報》都喺社論到勸政府「暫緩再議」噃！

商界仍感政府誠意不足？

　　嗱！《星島》就話，「對於政府貿然修改《逃犯條例》，商界一直有很大質疑，認為會令投資者人心惶惶，損害和香港營商環境，雖然政府為紓商界不安，將法例涵蓋的四十六項罪行剔除九項，但仍未能消除商界的憂慮。」唔通之前政府所講嘅從善如流，喺商界眼中仍然未夠？

　　文章亦都提到如果政府硬推會有咩後果：「政府必須謹慎估計修例對外商在港投資的影響，避免因執意推行而促使部分外商轉移他國，例如一直與香港『搶客』的新加坡。」、「施政會舉步維艱」、「直接影響今年11月建制派嘅區議會選情」等等，仲話「對上述種種負面影響，政府不能再置之不顧，繼續強闖，而應冷靜地就此全盤思量，若不宜進就果斷暫緩，認真審時度勢，再謀後着，這是負責任政府應有的態度」喎！

仲有冇「如沐春風」呢支歌仔唱？

　　不過《星島》都唔係第一日提出呢啲憂慮嘅，就好似之前佢哋老闆、全國政協常委何柱國喺佢哋公司嘅周年晚宴話：「以前啲人話喺大陸做生意，一返到香港就成身鬆晒、如沐春風，希望佢哋將來都可以如沐春風。」呢句說話已經有點味道喇！再加上自由黨黨魁鍾國斌就話政府唔應該急於修例，希望剔除多4項罪項；「田二少」田北辰今日亦都話「斬件上」好啲，建議政府先撤回修訂，先審議涵蓋地區唔包括中國其他地方嘅條文，之後下一步先再加返。最後結果如何？大家都係拭目以待啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情