政府終出手！倡虐畜可囚10年　咁先係文明社會

　　 「兔兔這麼可愛，怎麼可以虐待兔兔！」其實除咗兔兔之外，貓貓、狗狗同其他動物都唔應該虐待㗎！可惜香港地虐待動物嘅個案時有發生，無論係寵物定係流浪貓狗都未能倖免！作為一名有愛心嘅Lady，Jenny真係唔明白點解有人會咁狠心落到手囉！

政府終研修例保護弱小動物

動物保護政策講咗咁多年，政府終於肯郁手喇！今日開始，政府就會就修訂《防止殘酷對待動物條例》進行為期3個月嘅公眾諮詢，建議加重殘酷對待動物罰則，由而家嘅最高罰款20萬元及監禁3年，增加到最高監禁10年；同埋引入「謹慎責任」，即係無論係永久或暫時擁有動物嘅主人，抑或是管理或看管動物嘅人士，都要確保動物係有足夠嘅食水同埋良好居住環境等需要。

Sophia今日就去咗愛協了解動保工作，仲同貓仔玩。(政府新聞處圖片)

10年又過去……

Jenny覺得建議都幾合理吖！話晒動物同人一樣，都係有生命、會感受到痛楚㗎嘛！但係點解都仲係冇動物警察？食衛局局長陳肇始（Sophia）就話，其實警務處已經非常積極咁喺唔同地區安排做動物警察工作。之但係有隊專業嘅點都好過業餘吧？不過以政府推動政策嘅速度，Jenny都唔知要再等多幾多個10年先見到喇……

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情