2019-04-18

新聞自由談何容易做記者絕對唔易！

　　無國界記者每年都會公布「世界新聞自由指數」，今年繼續由挪威喺180個國家及地區中排第一，芬蘭排名第二，瑞典排第三……至於香港就排第73位，中國排第177位，較去年下跌1位。最唔自由嘅地方就係北韓同埋土庫曼。

中國越南新聞自由惡化美洲倒退最多

　　Jenny喺傳媒打滾咁多年，見盡不同機構作風，絕對明白「新聞自由」係幾咁重要！無國界記者話，今年只有24%嘅國家同地區，喺新聞自由被歸類為「狀況良好」或「狀況尚可」。

　　除咗點名批評亞太區內中國同越南新聞自由狀況加速惡化之外，佢地都有指出全球所有地區入面，美洲（北美和南美）在限制、違反新聞自由程度的區域評分退步最多，跌足足3.6％，唔止因為美國、巴西、委內瑞拉表現唔好，仲有尼加拉瓜（第114名）足足退步24名，是2019年退步最多的國家之一。至於，中東和北非地區的區域評分退步較少，但對記者來講，呢啲地區仍然係最辛苦、最危險嘅地方。

記者唔易做！

　　報告指，好多國家的政治領袖對記者都有敵意、加上來自不同地方嘅各種威脅、侮辱、攻擊，成為好多國家記者「職業公害」一部分，令記者面臨前所未有嘅恐懼同危險。Jenny幾時都話，無論身處咩地方，先進發達又好、槍林彈雨都好，敢為公義發聲，就要面對一定危險，呢份工一啲都唔易做！

　　講返貼身少少，無國界記者個報告入面話，亞太地區嘅媒體編採自主受到攻擊，好多地區嘅政府都開始全面新聞管控，更加形容「香港主流傳統媒體早已迅速遵守起北京嘅命令」。無國界記者東亞辦事處執行長艾瑋昂就話，今年都好關注香港嘅法治情況，尤其政府提出修訂《逃犯條例》，意味著記者將會面臨威脅。唔知各位讀者點睇呢？

一齊睇睇其他亞太國家或地區世界新聞自由排名：

韓國：第41名

台灣：第42名

日本：第67名

馬來西亞：第123名

印尼：第124名

菲律賓：134名

新加坡：第151名

越南：第177名

北韓：第179名

報告全文：https://rsf.org/en/2019-world-press-freedom-index-cycle-fear

《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。