三日唔埋兩日就講《逃犯條例》，真係你唔厭Jenny都悶！不過今日又有新「消息」喇！如果屬實，睇嚟呢個修例爭議或者只會持續多一個月咁大把……

二少爆響口 美芬幫手兜

　　《逃犯條例》爭議大就係人都知，至於建制入面最多意見嘅，相信都非實政圓桌田北辰（田二少）莫屬喇！而今日立法會嘅保安事務委員會就要開特別會議傾今次修例，有得同官員們一問一答。成日有嘢爆嘅田二少，今日首先就喺會議上爆司長局長到底有冇睇佢嘅信，話等咗佢哋好耐都冇回覆。保安局局長李家超就話佢有睇到佢封信嘅，不過要研究完先回覆。田二少聽完就爆出一句：「希望喺6月27號我投票之前你畀（到）我（答覆）！」6月27號？投票？睇返日程，似乎就係意指《逃犯條例》修訂草案啦噃……不過主席從來冇講過喎！咁呢個日子係邊個訂嘅呢？

　　田二少此話一出，民主派嗰邊梗係「嘩嘩」聲啦！二少就支吾以對：「呃…我估咋，我…我個人揣測咋。」民主派紛紛叫佢澄清，二少就話：「我睇報紙咋，我乜都唔知！」「報紙話揣測係咁呀嘛！」可能經民聯梁美芬都怕二少講多錯多，就幫田二少補鑊：「呢個唔係規程問題！」風波先暫時平息咗。

自稱「naive」，信不信由你

　　不過有咁爆嘅消息，行家又點會放過田二少吖！二少之後喺扑咪時就拎埋佢口中嘅兩份報道出嚟，話自己「好naive（天真）」，所以就信咗；又話自己係建制派入面最無可能收到內幕消息嘅人。至於各位看倌信不信，就由你了！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情