陰陰沉沉嘅6月又到，今日個天都時陰時晴，Jenny朝早起身嗰時，個天好似倒水咁，去到中午就出太陽。呢種咁唔穩定嘅天氣相信都會持續一段時間。一早起身逼地鐵返工已經唔係樂事，如果再撞著落大雨、打風咁，就更加慘豬喇！

　　講起颱風，相信大家最記得嘅係上年個超強颱風「山竹」襲港，雖然係星期日掛十號，但第二日就係星期一，打工仔係要喺路面完全未清理好、交通癱瘓、一片狼藉嘅情況下返工，都咪話唔Sad！

　　不過Jenny就留意到，噚日勞工處公布咗新修訂《颱風及暴雨警告下工作守則》，話政府會視乎情況，喺八號風號改為三號風號前公布「極端情況」，僱員喺八號風球取消後兩小時內，應留喺原本嘅地方，而非即刻啟程返工。政府亦都會審視情況，喺兩小時期限屆滿前，再公布會唔會延長或取消「極端情況」。即係話下次再面對有山竹咁強勁破壞力嘅颱風，大家都有機會唔使「攀山涉水」咁返工喇！

　　其實諗深一層，就算其他颱風冇山竹咁嚴重，要打工仔們一落波就即刻趕返工，都咪話唔慘情。試想像下本身全港留喺室內嘅人一下子湧晒出室外，交通唔癱瘓就奇啦！有咗呢個機制，大家預時間返工都有啲彈性，Jenny都覺得係好事呀！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情