直到今日，曾俊華遞信都已經有一個星期，但阿爺都仲未有聲氣畀曾俊華辭職，情況真係極為罕見。

　　政圈中人同Tina講，阿爺呢個做法已經出現有一個效果，就係好多建制選委都深信，曾俊華唔係被祝福嘅一個，呢個已經係對曾俊華往後嘅競選路更加難行。呢名政圈人士更相信，阿爺最終都係會喺提名期之前畀曾辭職，因為如果阿爺真係好唔願見到曾做下任特首的話，扣起辭職信至提名期結束係下下下策，會令唔少香港市民反感，咁就令到犧牲CY無晒價值，「最好方法就係喺提名票上面DQ佢，只要阿爺下令建制選委唔畀提名票曾，曾要入閘就只能靠泛民嘅票，試問佢拎住150張泛民提名票入閘，你估佢最後仲選唔選到？」

　　的而且確，拎150票入到閘唔難，難就難在，呢最少150票（或者更多提名票）真係要有一個建制佔多數、泛民僅僅少數嘅黃金比例，先拎到阿爺最起碼嘅信任。有人可能會問：「唔係喎，曾鈺成似乎都係站喺曾俊華嗰邊，應該有唔少建制票投曾俊華」Tina當然相信前大主席嘅政治能量，但到最後一刻，提名票係關乎現時建制派選委未來五年嘅政治利益，大家認為如果阿爺已經暗地講明唔好畀提名票曾俊華的話，有幾多人係夠膽將「要開名」嘅提名票交到去薯片叔叔手上？相信連曾鈺成嘅黨友都唔會有幾多個會敢做。

　　睇返剛剛公布嘅民調，曾俊華空有一身民意支持，但似乎拎到黃金比例入閘嘅機會真係幾危；自稱係泛民市民有52%表示撐曾，泛民市民撐林鄭嘅就只係得9.9%，而建制派市民有49.4%支持林鄭，得18%撐曾。Tina相信，如果只係有票在手嘅人去做呢個民調，個數字將會更加兩極。所以曾俊華入閘唔難，但佢極可能只可以靠泛民嘅提名票，如果真係出現呢個情況，曾俊華真係可以做到「官到無求膽自大」呢個官場最高境界。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇