《經濟不停學》魔高一丈－歷史上出現過嘅金融騙局

 　　世上騙子何其多，身邊總有一兩個！微信女、倫敦金呢啲其實大家都已經見好多，但歷史上出現過幾多金融騙案係呃晒身邊所有呢？今日就同大家一齊睇歷史大騙案，學多啲嘢旁吓身！

 

 (Shutterstock圖片)

Cash flow不停Loop－龐氏騙局

 

 (Shutterstock圖片)

　　

　　「龐氏騙局」大家都應該聽過，但個格局係點呢？通常騙子向投資者推介一個承諾風險細，但聲稱回報率超高嘅投資機會，但個計劃並唔係透過投資產生回報，而係通過不斷吸引新投資者嘅資金，然後將錢還畀之前嘅投資者。所以一旦無新錢流入，成個騙局泡沫就會爆破，個概念同我哋認識嘅層壓式推銷好似。

 

　　喺１９０３年，查理斯‧龐齊由意大利偷渡去咗美國尋夢，佢嘅名言係：「帶著2.5美元現金和100萬美元希望來到這裡。」趁第一次世界大戰之後各國經濟混亂，佢開咗間證券交易公司，聲稱購買歐洲某郵政票據再轉賣畀美國就可以賺錢，然後設計咗一個複雜且高額回報嘅投資計劃兜售，誇張到話可以喺45日內得到50％回報，一年未夠就昆走咗兩千萬美金，結果佢因為呢件事坐咗9年監，之後畀美國政府遣送番意大利。

 

沙律油灌水呃到美國運通，水份真係咁多?

 

 (Shutterstock圖片)

 

　　龐齊呃平民美國人，另一個騙子則夠膽呃尊貴身分象徵嘅美國運通公司。喺1950年代嘅美國，大豆沙律油用途好廣泛，但偏偏價格好唔透明，於是就畀一個叫安東尼．徳．安傑利斯嘅人有機可乘。佢成立咗一間植物油提煉公司，通過絕佳生意手段，令公司市佔率越來越大，為保持擴張，就需要不停融資。

 

　　於是，佢利用咗銀行嘅「就地倉存質借」特點水人一大筆。所謂「就地倉存質借」係指借款人將存貨當作抵押品融資，經過驗貨核數、存倉、開立收據手續後，借款人則可憑收據向第二間銀行借款。擅長投機、口碑不好嘅安東尼，偏偏同當時試圖拓展業務嘅運通公司一拍即合，而當時負責驗貨嘅員工雖然名義上係運通嘅人，但實際係安東尼嘅心腹。佢地就可以係啲沙律油入面灌水，誇大商品價值，居然都呃到５１間公司落搭借錢畀安東尼。

 

　　不過紙又點包得住火呢？帳面上值1.5億美金嘅貨物，居然實際只值600萬，全世界都懷疑緊佢有無咁多貨之餘，加上安東尼參與沙拉油期貨投資但突然大跌，間公司就咁破咗產，投資者當然血本無歸。最後安東尼因為呢件事坐咗7年監，1972年假釋出獄；出獄又因為畜牧龐氏騙局而再入獄，活到93歲（2009年）先死。

 

幾滴血救世界，係「痴」人說夢定覆水難收？

 

 (Shutterstock圖片)

 

　　如果話龐齊同安東尼走精面，「女版喬布斯」伊莉莎白‧霍姆斯就係一味靠吹、公關同造假嘅俵俵者。佢宣稱自己間公司Theranos可以通過創新嘅血液檢測方法，淨係抽好少血，就可以完成200幾項化驗結果。

 

　　其實因為技術問題，佢好快就發現到呢件事係無可能成真，但仲作啲假數據嚟呃人，最後佢間公司市值高達90億美元，甲骨文創辦人埃利森、美國前國務卿舒茲、媒體大亨梅鐸等都有份投資佢呢間公司！。雖然旗下出過部驗血機叫minilab，但只係將現有嘅多部分析儀器縮細，搵個殻重新包裝，仲同連鎖店合作，放部機喺佢哋鋪頭，但測試結果根本、唔準，搞到有人以為自己生癌呀陰公。

 

　　最後佢個套學喬布斯著樽領衫影相嘅手法後來再呃唔到人，喺醫學界質疑、員工爆料之下，成件事喺5年前畀報紙報咗出嚟，伊莉莎白至此跌落神壇。佢幾項欺詐指控今年７月出庭受審，最新消息係佢自稱有精神問題喎，法院裁定可以接受政府專家診斷。而佢最終會唔會得到應得嘅報應呢？似乎真係要放長雙眼啦。

 

 撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票