《Online有話兒》孤注一擲主角原型真沽空特斯拉，你會唔會又跟？

 　　電影《沽注一擲》講述主角係2007年至2008年期間睇到次按危機會引起嘅金融大海嘯，所以進行沽空賺取一大筆，對比無數金融企業大倒閉，唯有主角「一將功成萬骨枯」。而原型人物Michael Burry最近都有新動作，就係沽空特斯拉股票，唔知你又會唔會跟呢？ 

 

（Shutterstock圖片） 

 

Michael Burry沽空42億特斯拉

 

　　Michael Burry旗下公司「Scion資產管理」最近提交畀SEC嘅監管文件13F中顯示，公司首次擁有80.01萬股特斯拉看跌期權，價值5.344億美元（約41.68億港元），不過就無提到期權行使價、到期日及期權金等詳細資料。

 

　　Michael Burry係去年曾經在推特上表示：

 

　　「特斯拉依靠監管積分來創造盈利，對公司長期前景而言是障礙，而這部分的收入是一個正在融化的冰塊。」

 

　　所謂「監管積分」其實就係講緊透過出售「碳排放積分」實現盈利，歐盟對於車廠生產汽車嘅碳排放有嚴格控制，如果車廠碳排放低於歐盟標準，就會獲得「碳排放額度」並且可以轉賣，值得關注嘅係特斯已經連續多個季度透過出售積分來獲利，僅首季嘅「賣碳」收入就超過當期盈利，所以唔少人對於特斯拉呢種整靚報表嘅方式存疑。

 

特斯拉空軍曾成「燃料」，沽親都損手爛腳？

 

 

 （Shutterstock圖片） 

 

　　係美股世界有個笑話就係：「特斯拉空軍都係好友嘅燃料。」去年特斯拉股價累升7倍，有唔少分析認為特斯拉估值嚴重被高估，特別係公司未能夠完全靠賣車獲利，所以唔少基金都對特斯拉做淡，不過去年凡係做淡特斯拉嘅投資者全部損手爛腳，有分析公司做過研究，去年特斯拉空軍帳面損失超過400億美元(約3100億港元）。

 

　　不過今年美債息率急升，同時多隻科技股都開始出現回調跡象，而特斯拉股價亦從今年2月高位900美元回吐，昨日（17日）收市價為576.83美元，所以Michael Burry選擇做空未必係賭運氣，更大程度係可能睇到特斯拉炒作已經到盡頭。　　

 

Michael Burry都有預言「未成真」，曾賭ETF會崩潰

 

 

 （Shutterstock圖片） 

 

　　學醫出身嘅Michael Burry其實係自閉症患者，本身就不擅長交際，不過對數字相當敏感，正正呢份專注令佢睇到2007年次按危機出現，而佢係200年成立Scion基金，係2007年以6億美金豪賭地產泡沫出現，最後真係畀佢估中而賺取7.5億美元，成為次按風暴嘅唯一贏家。

 

　　不過係去年佢就預言過，再次引發美股下跌嘅金融產品會係ETF，因為其規模直至2018年已高達5.6萬美元，較2004年膨脹了15倍。佢認為一旦熊市出現，ETF會發生大型拋售，可能會對引起流動性低嘅股份出現泡沫問題，咁樣就會加速市場崩潰，而呢種泡沫已經被吹起。但經歷一年後，美股雖然都有經歷調整，但目前未見有ETF出現大型拋售而引起嘅市場動盪，所以有時候唔見個個預言都會「成真」嘅，今次沽空特斯拉，你又跟唔跟呢？

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好