《Online有話兒》去旅行去到盡！各地市民為去旅行有幾癲？

 　　疫情下全球人類都進入閉關狀態，相信好多人都「餓」旅行都餓咗好耐啦！自從有疫苗之後，各國都開始研究緊「旅遊氣泡」，又或者積極發掘本地遊，究竟人類為咗去旅行可以有幾盡呢？今日就同大家「些牙」下各地市民去旅行嘅有趣新聞啦！

 

（Shutterstock圖片） 

 

美國：假期報復性旅遊，連油價都扯高？

 

 （Shutterstock圖片） 

 

　　美國當地接種率已高達50%以上，所以對於市民進行本地遊或者外出食飯都相對放鬆，加上今日就其實係「陣亡將士紀念日」，所以唔少市民星期六已經出發！據美國運輸安全局報告表示，係本月28日當日已經有190萬人搭飛機出行，去年同期就只有32.7萬名乘客，而多個知名景點周圍嘅酒店都已經Full Booking，你都咪話唔誇張！

 

　　另外，美國人都流行「汽車旅遊」，揸住架車周圍去都幾爽皮！而美國汽車協會就預計，今年有3700萬美國人最少會揸車離開屋企最少80公里，正正因為咁而扯高油價！呢個月全美汽油平均價格就高達每加侖3.045美元，創下7年高位。所以近期國際油價飛升並唔係無道理，買架電動車又唔知會無會化算啲呢？

 

台灣：疫苗旅行團，位位最低消費11萬！

 

（Shutterstock圖片）  

 

　　以前都聽唔少「身體檢查旅行團」，即係參加者可以去飛去外地醫院做身體檢查，順便去當地進行旅遊觀光，聽聞以前有唔少富貴「老友記」都喜歡。而家呢類旅行團又再進化啦－「疫苗旅行團」，但位位最低消費11萬囉。

 

　　係台灣嘅互聯網社區最近就流傳一條「台灣赴美打輝瑞旅遊套餐」，34日嘅「豪華團」包括2劑輝瑞疫苗、機票住宿交通等，每位35萬台幣起，另加7萬台幣服務費，合共42.2萬台幣（約11萬港元）。據了解，到埗後先打第1劑輝瑞疫苗，然後再等26日打第二針，而等待期間，團友可以自由選擇租車或包車去玩，不過費用閣下自理啦！

 

香港：本地遊再啟，食店變身離境大堂

 

 （Shutterstock圖片） 

 

　　講起旅行又點少得香港人呢？本來同新加坡有「疫苗氣泡」，但最後都搞唔成，唯有搞本地遊啦！其實本月初已經開始有本地遊復辦，但每團只有30人為上限，而且導遊、旅遊巴司機都需接種首劑新冠疫苗或提供醫生紙先可以開工，而目前已經有200間旅行社合共開辦1500個本地旅遊團登記。

 

　　其實香港人想去旅行已經想到癡晒線，係大角咀嘉善街有一間餐廳，內裡全部都係機場離境大堂以及飛機內部裝修，而呢間食店更提供多款「飛機餐」，等大家止一止癮，相信想過下搭飛機癮的話，呢類主題餐廳都係一個幾唔錯嘅選擇！

 

撰文：李皆穎

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！ ► 立即行動