魚缸博客 | 長鑫儲存上市A股即爆升，仲有隻孖兄弟長江存儲值得留意！

　　海力士(US.SKHY)炒完又跌，炒完又跌，不如睇下開心嘢，就係長鑫儲存終於登陸上交所，股價仲要暴漲四倍，抽中就開心仔，其實上市定價就肯定留有水位，不過就係無估到A股都可以咁升法。

　　歸咎原因，就係本身個市場缺乏呢種公司，中國做儲存記憶體就係得兩間公司：長鑫儲存同長江存儲，前者做DRAM（即係大家講嘅電腦用RAM，咩DDR4/DDR5），後者都有做DRAM，但更主力做NAND Flash（即係以前我地叫HARD DISK，而家用SSD，入面個塊CHIPS）。

　　目前呢個行業，都係由御三家壟斷：三星、海力士、美光(US.MU)，佔據市場大約92%份額。中國人幾乎用上舉國之力，又培育又融資又國家入錢咁玩，先培育到呢兩間企業，哪怕邊一日韓企美企又話禁制中國入口，都不至於中國人無RAM用無SSD用。

　　所以你明白點解佢一上就好似爆炸咁款，因為佢同中芯(00981)、華虹(01347)個班一樣咁重要，而家係AI浪潮底下，不論CPU、GPU、RAM、SSD都缺一不可，如果長鑫、長江存儲可以係御三家搶到市場份額，咁市值就真係難以估計。

　　因此，大家可以留意下隻長江存儲，其實如果大家有玩開砌機，都會聽過呢間公司，遽聞生產出來嘅SSD，品質上未必好過御三家，但如果作為D盤平替品，佢確實係一個幾好選擇，因為夠晒平。

　　如果長江存儲上市，大家都可以留意下，因為分分鐘可以爆上都唔出奇！