世上已經無嘢可以阻止到高鐵香港段23號正式開通喇！話說唔少花生友都期待「山竹」襲西九，不過西九站今次唔算最當風，所以安全渡過。難怪林鄭都倍感安慰啦！今朝佢就一於區都唔落住，率先落西九站睇睇係咪一切準備妥當！同場，仲終於見到打風以來一直神隱嘅運輸及房屋局長陳帆（帆哥），真係Long time no see 喇！

唔知帆哥幾時會好似呢幅設計圖片咁，落區視察吓呢？

帆哥神隱去咗邊？

　　林鄭今朝就同深圳市委書記王偉中去到西九龍站視察，點少得港鐵一班管理層，好似主席馬時亨、CEO梁國權等人，而「失蹤多時」嘅帆哥亦終於首次公開現身！數數手指，佢對上一次公開現身係上星期三（12日）都係為咗高鐵，仲話「西九龍站好多嘢值得睇！」係囉！咁Jenny知點解你今日會出現喇！比起滿目瘡痍嘅道路同屋邨，點都係西九站Look Nicer啦！

　話時話，究竟呢幾日帆哥去咗邊呢？據Jenny向運房局打探，佢地就話帆過去成個星期冇休假，而且一直有參與政府內部商討應對超強颱風山竹襲港前後嘅會議，亦同相關政策局及部門的同事保持緊密溝通及協調。

楊潤雄落區最勤力

　　但何解打完風係由運輸署長陳美寶見傳媒解話呢？知情人士就話因為係運輸署負責24小時監察全港交通情況同協調各種公共交通服務安排，咁所以就由署長講返咁囉……但身為局長當日出來做吓樣，講兩句都好吖！始終都係解唔到小妹疑惑呢！

　　今次風災之後，公開落區視察最勤力嗰個，如無意外就係教育局長楊潤雄喇！Jenny覺得要畀個Like！咁又係呀！唔少學校都被山竹「吹」殘，作為國家未來棟樑嘅學生安唔安全、復唔復到課，好重要㗎！點可以唔睇緊啲！Right？