港鐵沙中線自5月尾以嚟，啲醜聞好似炮仗咁連環爆！港鐵都因此而大地震，震走咗工程總監黃唯銘、港鐵ＣＥＯ梁國權就要「提早退休」，「肥馬」馬時亨暫時企穩，不過下年續唔續到約就唔知喇。不過，事件另一「主角」－－承建商禮頓到而家都冇聲氣，相信大家同Jenny一樣，好想知道政府會點懲罰佢哋！

禮頓全面「停賽」一年

　　終於去到今日，發展局發新聞稿，公布港鐵沙中線紅磡站、土瓜灣站同埋會展站嘅工程問題中，對涉事承建商嘅規管行動。其中就包括大家都好關心嘅禮頓喇！

　　做得今次風波嘅「主角」，Jenny估禮頓都走唔甩要揹最大個鑊㗎啦！果然，禮頓因為涉及紅磡站同埋會展站嘅醜聞，分別被政府暫停其註冊所有工程類別的投標資格一年，同埋「建築（丙組）」及「道路及渠務（丙組）」工程類別的投標資格３個月，兩項懲罰係分期執行。

「屯馬線」唔吉利 改名轉運可諗諗

　　涉及咁嚴重嘅醜聞，都只係罰暫停投標資格一年，點睇都唔夠喇！當局就話，政府會保留採取進一步規管行動嘅權利，若將來獲得更多紅磡站工程醜聞嘅資料，發展局會重新檢視情況，「有需要時會採取進一步合適的規管行動」。Jenny記得，之前政務司司長張建宗都講過同樣嘅說話，若果政府收唔到滿意解釋，最嚴重會停禮頓牌，唔知禮頓點拆呢？

　　Jenny睇返發展局嘅認可公共工程承建商名冊，可以做到丙組合約，即價值超過港幣3億元的合約，其實選擇唔多，有唔少聽講仲有財政問題。唔知嚟緊呢年啲大型基建工程，有邊啲公司夠胃口食呢啲丙組合約呢？By the way，自從沙中線公布咗命名為「屯馬線」呢個騎呢名之後，一直都唔多「老黎」，港鐵睇嚟除咗換承建商，不如考慮下學明星咁改名轉運吖！