09/07/2018

發揮O2O　網上搵客、儲客策略多

收藏文章

　　以前做零售嘅都聽過一句說話：「五窮、六絕、七翻身」，即五、六月生意淡靜，七月暑假當旺。近年零售商都好興用O2O市場策略，從網上吸引客戶到商店，令傳統淡季同樣暢旺。講到O2O（Online to Offline）策略，市場上有唔少新技術，幫助商店吸引客戶、同客戶保持聯繫，全面發揮O2O優勢。

　　VR技術近年大熱，唔只應用喺電子遊戲上，零售商、樓上店同餐廳亦相繼利用該技術喺網上吸引客戶。例如將店內環境製成全景模式，等客戶可以喺虛擬環境「shopping」或參觀，重點展示貨品同埋特別內部裝飾，並可點擊打開進一步查看介紹。同時，可將貨品製成全景圖，喺網上畀客人自己瀏覽同分享，仲可以喺同一介面上附加優惠禮券或特別折扣資訊，即時下載，有效咁帶動顧客到訪實體店內選購，刺激銷售。

　　當客人從線上（online）被吸引到線下（offline）走入實體店，商戶可喺店內透過唔同數碼技術同設備留住客戶，例如店內加裝數碼顯示屏就係其中之一，顯示最新產品、客戶訊息，甚至辨認男女顧客，顯示度身訂造嘅特定訊息，銷售人員可進行產品或服務詳細介紹，客戶有更貼心嘅購物體驗。

　　另外，商店提供免費Wi-Fi服務亦十分普遍。商戶除咗可以喺登入版面放置廣告外，亦提供多一個途徑畀客戶登記Wi-Fi服務，經社交媒體帳戶，從而收集用戶資料，方便日後推送優惠訊息。咁就可以將登入版面塑造成強勁宣傳平台，幫助零售商、食肆等與客戶建立關係，即使客戶離開店舖後，亦能透過社交平台保持聯繫。事實上，現時社交網絡新增支持者愈來愈高成本，透過Social Wi-Fi能有助解決這問題。商戶仲可以透過管理平台作用戶分析，了解客戶嘅資料、消費行為等作規劃市場策略。

　　設有會員制度，與客戶保持緊密聯繫，係提高客戶忠誠度嘅重要因素。過去礙於成本太高，中小型商戶未能實現。而家隨著雲端應用程式普及化，成本已大大降低，很多商店已經設會員制度，定時提供最新產品資訊，仲可以加設積分系統，即時查閱消費紀錄同埋積分優惠等數據，可用作行銷與推廣策略回饋尊貴會員，有些供應商仲包括流動應用程式同埋配合流動通訊。技術令中小型零售業同食肆都可以活用O2O，從網上吸引客戶，並通過社交網絡、會員通訊保持互動、聯繫，唔駛再怕傳統消費淡季，實行全年生意暢旺。