《小傳日記》關稅出台後市向上走向下走？50天線死唔死守到？

　　《小傳日記》醞釀大半個月嘅對等關稅終落地，身為美國總統嘅特朗普仲自製道具，羅列出唔同國家點樣針對美國收關稅，繼而加返對方幾多關稅。其中中國仲特別擺喺榜首，清楚寫明加34%關稅；果然生意佬出身寧舍識得做present。

　　事實呢個日子都好有針對性，4月2號公布，係為業績期完結兼反映曬業績因素之後，等全世界乾乾淨淨聚焦喺佢嘅關稅政策身上，特別對大市有影響性。不過可能已經吹得太耐風，魚缸今朝低開500幾點，一掂到條50天線就一觸即彈，全日埋單只係跌350點多啲，比起預期已經少咗。

　　唔係話望個市一定要跌，但前後54%關稅其實係為好重皮，好在孖屐一早price in咗先跌得少咗。睇返魚缸走勢，一跌到50天線已經有支持，一來50天線係1月底以來嘅支持位，二來由上個月高位24874高位到今日開市低位22638計，已經回吐大約9%，9日RSI以低位計都接近30，有技術反彈都係非常正常。

　　但技術反彈都係技術反彈，目前除咗超賣之外都無咩推升返恒指嘅因素，其中最多不確定性當然係阿爺嘅回應。目前商務部雖然講咗會有反制措施，但實則點落實仍然有大把空間。同時美國財長貝森特就講明話「切勿報復」，只要唔反制就唔會再加上去，令個波即時落返喺阿爺度，點樣反制到同時又唔會刺激美國佬再加上去，就係目前嘅市場焦點。

　　再睇多點就係人民幣匯價，噚晚關稅一公布離岸人民幣就最多跌過680幾點子，但開市前匯價回升返啲，相信都係支撐今日市況嘅一大原因。而睇返美匯指數，基本上噚日開始就一直跌落去，到今日下晝跌幅更加擴大，目前已經回落到102.2水平，美元減弱相對於人民幣以及大市都會有大啲嘅支撐，所以以目前數據嚟睇大市比較大機會傾向有得唞一唞，算係護一護50天線。

　　但政策市嘅嘢一必都要睇政走向，過去呢兩日北水淨流入都唔細，雖然有可能係沽空嘅錢但係撈底都有可能，有無春江鴨預知阿爺救市行動而入市都唔知，所以都唔包50天線一定唔穿，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。