《小傳日記》Prada收購范思哲，新世代唔識貨寧願帶返意國？

　　《小傳日記》近期財經版鋪天蓋地關稅戰，今日你加我幾多，聽日我又加返你幾多。今日話加，聽日又可以話唔加住。關稅咁兒戲，股市一樣咁奇葩，隨時經歷地獄與天堂。今日喪插三千，聽日又狂飆三千，刺激程度絕對唔輸過山車。股市係咁暴升暴跌，已經搞到小散戶精神崩潰。

　　所以筆者今日唔講關稅，講返啲好嘢先。Prada(01913)宣布，以13.75億美金向Capri收購同業范思哲(Versace)控股公司GIVI Holding。完成收購後，范思哲將成為Prada附屬公司。隔晚Capri美股收市跌一成；同日Prada美股收升2.4%，今日港股一度升近8%。呢單買賣邊個著數？睇雙方股價表現，相信已經搵到答案。

　　上月初就有傳聞指，呢單刁作價16億美金，而家13.75億美金就有成交，Prada大喇喇慳返2億幾美金，認真飲得杯落！不過，有人歡喜有人愁，Capri 2019年1月以超過21億美元收購范思哲，而家低價賣返出去，六年之間慘蝕7億幾美金，蝕幅34.5%，都咪話唔傷。

　　Capri當年收購范思哲，目標係要打造一個花旗奢侈品集團，但人算不如天算，接連四年嘅新冠疫情衝擊，加上管理不善，令Capri陷入困境，不過去到2024年范思哲營收都只有10.3億美元，利潤率僅得0.4%，莫非仲可以賴到疫情度？相反Prada似乎就愈戰愈強，期內營收由2020年24億歐元，升到2024年54億歐元，升幅1.25倍。賺錢能力更加唔到你唔服，Prada2020年仲蝕緊5400萬歐元，第二年即刻扭虧大賺2.9億歐元；之後年年以雙位數上升，舊年純利升至8.4億歐元。所以，生意唔好就搵疫情做擋箭牌講唔通，花旗國唔識貨，俾你買起又點，生意一年不如一年，愈做愈差。名牌奢侈品同普通商品唔同，一旦愈做愈差，知名度同人氣急降，有損形象，品牌價值自然大打折扣。唔賣出去怕且只會愈做愈差，最終只會搞到個品牌Cheap曬。

　　如果熟悉時尚嘅人，都知道范思哲的標誌就係張狂嘅美杜莎logo、奢華金同豹紋，但老老實實，你喺街上有幾何會見到青春少艾著到成身金或者配個豹紋手袋？范思哲從昔日驚艷眾人嘅紙醉金迷風格，到而家變土豪look，Z世代唔啱你呢一套，時尚魔頭都會有過氣一日！

　　而家Prada收購范思哲，有媒體形容為帶返意大利，重振「MADE IN ITALY」聲威。無獨有偶，創辦人范思哲1997年在花旗國佛羅里達州遇刺身亡後，骨灰亦帶返意大利安葬，今次品牌范思哲被同鄉Prada帶返意大利，唔知係冥冥中早有安排，定只係一個巧合？無論如何，范思哲泉下有知應該感到安慰先係，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。