《魚缸博客》侵侵造市，中國拋債，關鍵還看一點！

　　今日有兩單新聞想同大家探討下，第一就係侵侵係社交平台叫人入貨，然後道指開始爆升；第二就係有傳神州帶頭拋售美債反擊關稅戰，令到債息率飆升。

　　侵侵出口述來講，都已經唔係第一次，反而想知而家民主黨係咪打算咩都唔做，等侵侵大玩特玩，定係等侵侵打關稅戰打到尾聲先再開波？雖知道出口術影響股市大升大跌，假如侵侵自己都有買貨賣貨的話，係可以從法律途徑著手處理，其實華爾街已經有人出緊聲，後續係點有待觀察。

　　而有關於神州帶頭拋債，博客信係真，亦只有神州拋債，先會影響到美債價格咁樣跌。至於有人話「侵侵正在下一盤大棋」的論說，博客覺得只係得啖笑，其中一個講法係侵侵等緊邊個國家唔反制，就會有計傾，而神州因為反制左，所以只會不停加關稅。

　　首先呢場貿易關稅戰，就算神州反唔反制，都係被花旗國針對，所以唔存在「有計傾」一說；其次就係，呢場戰爭係鬥「耐性」，即係究竟關稅問題會捲死神州先，定係通脹問題玩死花旗國先。
　　
　　長遠嚟睇，只要神州喺花旗國中期選舉前死撐，同時花旗國通脹一路捲到連雞蛋、洗頭水都買唔起，學網紅MATT LEUNG大哥話齋:「有飯食就民主，無飯食？就自己返屋企煮」。博客認為，當花旗國連民生問題都解決唔到，侵侵地位就自然岌岌可危，唔使神州出手，關稅問題自然瓦解。

　　其實全個世界都玩緊供應鏈同專門生產，中國係製造業大國，美國係科技大國同農業大國，無話你叻一樣就唔俾人叻第二樣，大家一人叻一樣先可以做到交易。而家美國唔賣晶片俾中國，又要想做到貿易順差，博客就覺得有小小精神分裂咁，難道美國認為單靠賣大豆石油俾中國，同時加下關稅就可以平衡到順差逆差問題？搞笑啦真係。

《編者按》本欄搜羅即市傳聞，惟消息未經證實，《經濟通》亦不保證內容之準確性。