《小傳日記》關稅倒計時仲剩一日，全球化苦主蘋果點樣絕地求生？

　　《小傳日記》侵侵關稅大棒亂舞，無論係供應鏈集中定係多元化供應嘅公司統統都唔好過。
組裝ｉＰｈｏｎｅ嘅印度要交２６％關稅，生產ＡｉｒＰｏｄｓ嘅越南要畀４６％，世界工廠神
州要交５４％，話唔定要交１０４％！自對等關稅公布後，蘋果近三個交易日大跌１９％，創咗
近２５年以嚟最差嘅三日表現。蘋果明明係花旗國嘅公司，但花旗國民以後可以買到嘅
ｉＰｈｏｎｅ可能比其他國家貴一截！花旗國消費者引發恐慌情緒，多家本土蘋果商店員工對媒
體話，因為預計價格上漲，周末蘋果商店遭大規模搶購。
　
　　有分析師甚至估計，如果蘋果要喺美國本土生產，ｉＰｈｏｎｅ可能賣到３５００美金一部
，折合港紙２﹒７萬蚊，同宜家最貴嘅ｉＰｈｏｎｅ　１６　Ｐｒｏ　Ｍａｘ　１ＴＢ賣
１５９９美金相比，真係嚇死人。
　
　　距離對等關稅生效僅剩一日，但蘋果無可能喺短時間內轉移供應鏈，外界對蘋果未來嘅策略
路徑有兩種睇法。一種係激進派，認為蘋果至少加價三成先可以填補關稅大窿。而另一種係溫和
派，包括科技記者古爾曼同「最強蘋果分析師」郭明錤，古爾曼認為蘋果可能會玩啲「以舊換新
」優惠，推啲分期付款計劃，或者重新考慮硬件訂閱服務，嚟抵銷潛在嘅價格上漲，而郭明錤認
為，如果蘋果唔加價，毛利率短期可能會跌８﹒５％至９％以至於到四成樓下，但長遠睇都仲有
得維持喺四成以上。
　
　　但講到底，蘋果都係要揸緊時間應對呢場「關稅大戰」。目前市場預計蘋果主要有四條路可
以行。第一條就係供應鏈轉移，增加低關稅地區嘅生產比例。今日都有消息話，蘋果計劃從印度
進口更多ｉＰｈｏｎｅ以抵消關稅帶嚟嘅高成本。對比神州強硬嘅態度，呢啲主動降低關稅嘅東
南亞國家都更有可能同美國政府傾掂數，攞到降低關稅嘅優惠。郭明錤估計，如果印度同越南都
能被豁免關稅，蘋果嘅毛利率下降幅度可能會由原本嘅８﹒５至９％縮窄到５﹒５至６％。如果
再進一步提高印度ｉＰｈｏｎｅ嘅生產能力，令印度喺全球供應鏈入面嘅比例提升到３０％以上
，咁關稅影響甚至可以壓低到１至３％。
　
　　第二條路，都係業界認為蘋果最有可能採取嘅措施，就係將關稅成本轉嫁俾供應鏈廠商。古
爾曼提到，蘋果嘅採購團隊宜家好大機會已經喺度同零件供應商傾緊價。
　
　　第三條路，直接加價。郭明錤認為，花旗國市場上新款高端ｉＰｈｏｎｅ佔比大概有６５至
７０％，呢啲高端用戶相對比較能接受加價。古爾曼亦認為，花旗國好多用戶本身都會用分期付
款或者以舊換新計劃去買新手機，所以對定價嘅敏感度冇咁高。
　
　　最後一條路，就係蘋果自己吸收部分成本。宜家蘋果硬件產品嘅毛利率大概有４５％，其實
仲有啲調整空間。
　
　　當然，蘋果仲可以學返自己當年喺德州奧斯汀搞嗰啲「政治樣板工程」，整個廠出嚟畀侵侵
睇下，順便換返啲關稅豁免。雖然廠產能低到可憐，但政治上都算有交代啦。到時仲可以畀侵侵
當成政績吹下水。請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。