《魚缸博客》雙十一促銷疲憊冇晒feel，不如睇睇快遞股

　　雙十一又嚟啦，淘寶「滿99包郵到港」嘅廣告真係鋪天蓋地，無論係港鐵定係叮叮車，早喺一個月前就已經見到宣傳板，甚至區區slogan都唔同，認真大手筆。不過講真，雙十一嘅氣氛真係越嚟越冇以往咁濃厚，好多人唔講都唔記得，今日原來係雙十一正日添。

　　最近刷微博都好少見到雙十一相關話題霸住熱搜榜，真係有啲冷淡，可能同時間跨度太長，引致觀感疲勞有關啦。今次雙十一號稱歷史上最長，天貓、京東、小紅書個個都拉長至28至33日，一年都係得365日啫，成件事即刻變得好咁特別，令大家對雙十一都有啲免疫同疲倦。試想你係一個上班族，呢一個月以來都要繃緊神經，mark低每日幾點搶券同開售時間，再加上堪比數學題嘅超複雜促銷規則，從簡單折扣變成定金預售、尾款後補、跨店優惠疊加，計到頭都大，比著我就由得佢喇。

　　仲未計促銷節日其實多到爆，各電商平台上半年已經喺618搞過促銷活動，再加上各種節日促銷、造物節、年貨節、開年總動員等數不勝數，連淘寶今年都唔搞雙十一晚會，過往嘅瘋狂購物氣氛已經不再。大家心諗，反正今次唔買，下次又係全網新低。

　　講到網購，梗係要提到快遞啦。話說順豐控股(深:002352)今個星期就開始路演，預計本月27日上市，博客提提大家近期可以關注快遞相關嘅影子股，例如京東物流(02618)、中通快遞(02057)、嘉里物流(00636)等。睇番京東物流上個月先創咗自2023年3月以嚟嘅新高，近期走勢平穩，現時逼近20天線（約15.469元）水平，估值偏貴，相反中通快遞最近經歷過調整，從219銀跌回167元水平，更加抵買。
　　
《編者按》本欄搜羅即市傳聞，惟消息未經證實，《經濟通》亦不保證內容之準確性。