《魚缸博客》望住個二萬點關口，又預備打穿啦！

　　經歷過血的教訓之後，恒指今日先反彈少少咁。

　　有睇開博客文章嘅，博客曾經係3月21日曾經咁寫:「恒指呢隻牛由今年1月的19000點開始，直衝到今年高位24874，所謂不升則跌，連續三幾日都突破唔到25000呢個平台線，博客就知道升勢差唔多盡頭了；呢次回吐，關鍵位係大約22500呢個水平，即係向下睇仲有千幾點，但會唔會都守唔到呢？博客覺得防守性幾弱下，玩下手淡軍開多幾張大期，真係一路向下穿20000點都唔出奇。」

　　最終，昨日（7日）一炮過跌穿二萬，一車車牛送入屠房，見住好多牛牛流晒眼淚，博客心都酸埋。

　　其實3月尾睇期指成交已經有異樣，博客只能夠講，大莊搵食係早半個月settle好，只係等一個藉口推倒。睇返美股VIX恐慌指數，一路都keep係40-50之間，對上一次係40之上，都講緊係2020年嗰次因為COVID帶來的金融恐慌；而今日仲係46，即係話市場仲未恐慌完，其實道指一下裂口跌穿，個底係32000點，跌多幾日、恐慌多幾日就到，大家想買美股可以READY了。

　　至於港股，博客認為20000點向下炒機會頗大，雖然國家隊進場救市，但博客份人比較悲觀，國家隊出手，只係能令港股呢個市等佢「死得無咁辛苦」，博客認為完全不能救起，主要係大部分公司業績唔算太出色，加上外圍股市氣氛差極，保守估計要去到18500點個水平先有機會反彈。

　　玩下手如果18500點都穿埋，咁就直穿埋地心，睇14000-16000左右了。所以20000點關口唔使睇了，大戶開多幾張大期都可以推倒，想買熊仔的朋友可能選擇不多（大部分都因為槓桿問題升得太高而無肉食），有銀彈嘅其實可以開張細期向下炒，反而值得玩下。

《編者按》本欄搜羅即市傳聞，惟消息未經證實，《經濟通》亦不保證內容之準確性。