RSS訂閱 最近討論區繼續講緊「復活節幾日，香港各個口岸人頭湧湧」，究竟係香港飲食/服務行業咁差勁，定係神州飲食咁吸引呢？
博客呢一轉返左福田玩兩日一夜，真係行過街周圍都係「港式粵語」，去九毛九(09922)旗下「太二酸菜魚」食飯，都係香港人為主；蜜雪冰城(02097)、霸王茶姬一街都係，開波點餐個陣，順便喺美團(03690)外賣APP叫返幾杯「伯牙絕弦」（霸王茶姬名物）送到餐廳，食緊酸菜魚個陣，外賣員就送到杯嘢飲啦。
呢種服務體驗，應該全世界得神州獨有，喺人地餐廳叫第二間餐廳嘅嘢飲，仲歡迎你咁做。博客成人都講，人地神州服務餐飲業，做到上市係有原因的，因為不論服務質量定係情緒價值，都係提供到足夠體驗，等你仲想返去試多幾次。
其實港人喜歡返神州消費，最大原因，都係貨幣問題。想當年博客細細個，港元兌人民幣仲係100:120嘅年代，一枝可樂兩蚊，一餐飯150蚊以內一家四口飽住走，一樣大把人返去消費；只係慢慢人民幣去到七算，內地客覺得港幣好用，港貨好抵買，先多左自由行來港消費；今日只係風水輪流轉，香港人「回到過去」，人民幣兌港元而家都係93-94咁上下，所以大家上返神州嘆世界。
唔同嘅係，內地服務/飲食業真係越做越好，每間餐廳有晒自己SOP流程，保證間間分店服務/食品質素差唔多，而且服務員都係後生仔女，望多兩眼都賞心悅目；香港飲食業真係大部分都係「嬸嬸級別」，未食飽又趕人走又唔可以坐耐少少，座位又窄又細，都唔好講食品質素啦。
咁樣對比之下，港人返神州消費，都好正常啦？
博客覺得唯一香港仲有優勝地方，就係冷氣開得好足，可能有人留港消費就係舒舒服服，唔想同人迫囉。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇？】特朗普出兵委內瑞拉、拘捕馬杜羅？立即參與投票，睇睇大家對國際法同「新門羅主義」有幾大分歧。► 立即投票
