《小傳日記》阿爺轉舵煲科技股救經濟？早喺上年十月已經有跡象！

　　噚日大市升足600幾點後忽然大幅回落兼倒跌，以為係食胡沽貨，點知原來係大型震倉行動，震走散戶以備今日嘅好消息，真係pat pat細少少都會震走呀，咁就等唔到今日阿爺同科技大佬開見面會嘅好消息喇！

　　今日晏晝《路透》引述消息人士報道，話阿爺最快下個星期一會開座談會，到時將會同商界領袖會面，尤其係科技行業領袖，座上客包括QQ(00700)馬化騰、小米(01810)雷軍，仲包埋罕有露面嘅巴巴(09988)馬雲。《路透》話兩位消息人士提到，預計習近平將會鼓勵呢班企業家，喺中美日益緊張嘅科技戰背景下，積極拓展在國內外業務。

　　曾經科技公司嘅坐大係最為上面所棹忌，阿爺怕科技進化得太快會令自己難以掌控，所以就喺2021年至2022年期間大搞監管，逐步對唔同類型嘅科技公司行為做監管，經歷過呢好幾年，雙方好唔容易先搵到一個平衡，係大家舒服嘅位置。

　　近期DeepSeek大熱，除咗唔同公司爭著接入DeepSeek博炒起股價之外，連國企之一嘅三大電訊商都要接入DeepSeek，就知阿爺對科技公司嘅取態真係唔同咗。望著美股熱炒AI咗一兩年，假如神州AI不進則退影響嘅唔止係行業，更係國家嘅聲望，以上面嘅口風嚟睇，今次唔只係網信辦搞座談會，係由國家主席直接見面，程度可想而知係大大不同，更係阿爺有意力推AI嘅跡象。

　　事實上科技股都唔係炒咗一兩星期，而係今年以來喺無消息之外都不斷炒起，好似中芯(00981)、長飛光纖(06869)、金山雲(03896)之類AI底層科技支援類公司，係上年10月開始炒起，呢段期間應該就係消息逐步由核心嘅內圍向外延伸，令到呢段期間股價不時炒起，足見今次風向改變嘅醞釀時間。

　　尤其係連馬雲呢位曾經上面睇唔順眼嘅一員，都喺今次座談會嘅座上客，就知道上面有幾著緊想要靠科技公司救經濟。DeepSeek正係一個催化劑，燃點起阿爺同孖屐對神州AI科技嘅希望，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。