《楠楠自語－莫灝楠》長江專注受規管行業回報穩定項目

　　呢排財經界最轟動嘅新聞，一定係長江集團主席李澤鉅單「千億賣電」大Deal。睇住傳媒鋪天蓋地咁報，真係令人諗番起其父、長和系創辦人李嘉誠當年嘅千億「賣橙神話」。
　
　　特別要注意嘅係李澤鉅喺評論交易時表示：「將繼續尋求投資及發展機會，放眼於現有及新開發市場（包括英國及其他地區），物色受規管行業以及擁有長期穩定合同的項目。」呢番言論揭示咗長江集團將繼續專注投資喺受規管行業，同埋擁有長期穩定合同嘅項目。
　
　　當然好多人成日會問，長和系點解咁鍾意買埋啲水務、電力、天然氣網絡？呢類生意最勁嘅地方係，透過擁有長期合同項目，就唔使理市況高低，喺特定期間有穩定收入及可靠回報。再簡單啲講，受規管行業其實就係「攞牌收租」嘅生意，呢啲就係普羅大眾一定要幫襯嘅生意。無論個世界點變、經濟幾差、地緣政治幾亂，你返到屋企總要開燈、沖涼、煮飯。佢嘅回報通常受政府合同框架保護，唔會畀你賺暴利，但就保證利潤，仲通常可以跟住通脹加價。
　
　　講番今次單交易嘅主角UK Power Networks（UKPN/英國電網），其實都係好typical嘅「長建式交易」。由最初買入到今日，前後16年間，計埋歷年收息以及今次賣股權攞番嚟嘅現金，總回報又可以高達六倍。呢個數據話畀大家知，老派基建嘅必要－－雖然無科技股嘅高增長，但只要你夠耐性，又識得經營，回報一啲都唔失禮，而且喺AI高估值互投、外圍大風大浪嘅環境下，受規管公用事業嘅回報仲要相對穩定得多。
　
　　依家個市人人都講AI、講半導體，雖然科技股溢價高、彈性大，但風險同樣高。長江集團就話畀投資者聽：除咗投資新科技外，集團嘅舊經濟一樣可以高回報。基建股雖然無科技股嘅溢價，但勝在現金流極度穩定。呢啲資產就好似一隻雞乸，平時每日準時生金蛋，等隻雞養肥咗，市場有個靚價，就賣咗佢大賺一筆，再搵另一隻又「好生養」嘅。對於追求長線增長嘅資金嚟講，非常有吸引力，當然亦好考進入受規管行業嘅部署同決心，加埋尊重穩定合同嘅文化同紀律。
　
　　集團層面交棒鋪排咗咁多年，市場一直觀察緊管理能力如何。計晒長建(01038)年年加派息嘅往績，加埋今次呢單Deal，唔單止係為集團攞番一大筆現金去搵新機會，更重要係穩住咗投資者嘅信心，證明家族企業當中李氏嘅「管理層溢價」，唔單止守到業，仲可以捉到好嘅交易時機，喺守業中繼續創業。
　
　　講到尾，大家追求嘅未必係（亦無必要係）大波幅，而係一種瞓得著覺嘅安全感。長江集團專注喺輸水、配電、廢物處理呢類受規管行業、高穩定性嘅合同業務，日日收錢，唔係燒錢，悶住贏好過刺激咁輸。《方德證券高級分析師　莫灝楠》
　
*《經濟通》所刊的署名及/或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。