按盤價 
《魚缸博客》聯儲局四年來首次減息，仲要一減就減半厘咁多，搞到市場開頭都窒一窒，唔
知點反應。不過冷靜過後就興奮到停唔到，昨日道指創收市新高，港股呢邊要創收市新高唔知要
等到何年何月，不過今早一度升番超過３００點，散戶一樣笑呵呵。但係留意番，大市炒得咁興
奮，細價股要興風作浪就無咁易。
港股回勇，大部分股票都受惠，就連積弱已久的內需股都普遍上升。一提起內需股，大家都
只會想到食品飲料，餐飲運動服之類的龍頭，卻忽略了做衣物清潔護理產品龍頭藍月亮
（０６９９３）。藍月亮喺２０２０年底上市，由於內地知名度高，當時認購踴躍，超額認購
３００倍，比起近日上市嘅龍頭家電股先得兩倍超額認購，簡直係差天共地。藍月亮上市首日股
價一度升２５％，收市每手仍賺８百幾銀。由於分配股份時側重小散戶，即使高達３００倍超額
認購，但一手中籤率仍高達５５％，可謂皆大歡喜。
可惜嘅係，藍月亮股價上市後無幾耐創下１９﹒１６銀（除淨前）上市新高後，股價就拾級
而下，而家得返２﹒２２銀左右。股價之所以跌咁多，又唔關呢兩年內需疲弱事，因為由
２０２０至２０２３年呢四年間，集團每年營收大致在７０億人仔，可以算係穩定，但係弊在純
利走曬樣，由２０２０年賺１３﹒１億人仔，去到２０２３年純利剩返３﹒３億人仔，比
２０２０年少咗７５％，而今年上半年仲誇張，半年營收雖然增長四成至３１億人仔，但虧損額
竟然擴大至６﹒６億人仔！
翻查中期成績表，原來公司推廣開支由舊年同期２﹒７億人仔飆到嘅１０﹒９億人仔，做多
９億人仔生意，但就使多８億人仔去推廣，認真令人搲晒頭，呢條數點計？可惜管理層無出來解
畫。博客原本覺得，做得衣物清潔用品都係實幹企業，應該平平穩穩先係。就算經濟放緩，內需
變內衰，但點都唔會唔洗衫，連洗衣粉錢都慳埋。博客又真係無諗錯，生意其實唔係差，只係盤
數差。所以博客見到咁嘅成績表，心情十五十六，堂堂一家知名上市公司，無論係財務管理定市
值管理都做得唔好，產品再出名再好都幫唔到，股民想趁低吸納都要做好心理準備。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】東南亞藝術市場是下一個熱點？一探各地獨特及吸引之處！► 即睇
