《魚缸博客》雙十一促銷疲憊冇晒ｆｅｅｌ，不如睇睇快遞股

　　《魚缸博客》雙十一又嚟啦，淘寶「滿９９包郵到港」嘅廣告真係鋪天蓋地，無論係港鐵定
係叮叮車，早喺一個月前就已經見到宣傳板，甚至區區ｓｌｏｇａｎ都唔同，認真大手筆。不過
講真，雙十一嘅氣氛真係越嚟越冇以往咁濃厚，好多人唔講都唔記得，今日原來係雙十一正日添
。
　
　　最近刷微博都好少見到雙十一相關話題霸住熱搜榜，真係有啲冷淡，可能同時間跨度太長，
引致觀感疲勞有關啦。今次雙十一號稱歷史上最長，天貓、京東、小紅書個個都拉長至２８至
３３日，一年都係得３６５日啫，成件事即刻變得好咁特別，令大家對雙十一都有啲免疫同疲倦
。試想你係一個上班族，呢一個月以來都要繃緊神經，ｍａｒｋ低每日幾點搶券同開售時間，再
加上堪比數學題嘅超複雜促銷規則，從簡單折扣變成定金預售、尾款後補、跨店優惠疊加，計到
頭都大，比著我就由得佢喇。
　
　　仲未計促銷節日其實多到爆，各電商平台上半年已經喺６１８搞過促銷活動，再加上各種節
日促銷、造物節、年貨節、開年總動員等數不勝數，連淘寶今年都唔搞雙十一晚會，過往嘅瘋狂
購物氣氛已經不再。大家心諗，反正今次唔買，下次又係全網新低。
　
　　講到網購，梗係要提到快遞啦。話說順豐控股（深：００２３５２）今個星期就開始路演，
預計本月２７日上市，博客提提大家近期可以關注快遞相關嘅影子股，例如京東物流
（０２６１８）、中通快遞（０２０５７）、嘉里物流（００６３６）等。睇番京東物流上個月
先創咗自２０２３年３月以嚟嘅新高，近期走勢平穩，現時逼近２０天線（約１５﹒４６９元）
水平，估值偏貴，相反中通快遞最近經歷過調整，從２１９銀跌回１６７元水平，更加抵買。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。